Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 274 Hüküm no: 286 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Abdullah’ın Osman Beşe b. Süleyman’dan muhalaa ile boşandığı Mahrûse-i Galata muzâfâtından kasaba-i Kasımpaşa’da el-Hâc Hüsrev mahallesinde sâkine Fâtıma bt. Abdullah nâm hâtun zâtı ba‘de’t-ta‘rîfi’ş-şer‘î meclis-i şer‘de zevc-i muhâlı‘ı işbu râfi‘u’l-vesîka Osman Beşe b. Süleyman nâm kimesne mahzarında ikrâr ve takrîr-i kelâm edip zevcim mezbûr Osman ile beynimizde adem-i hüsn-i mu‘âşeretden nâşî hul‘a tâlibe ve ve râgıbe olduğum ecilden zimmetimde mütekarrır ve ma‘kūdün-aleyh olan bin iki yüz akçe mehr-i mü’eccelimden geçip nafaka-i iddet ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ oduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-gurre-i Zilka‘deti’ş-şerîfe sene 1137. Şuhûdü’l-hâl: İbrahim b. Muharrem, Halil b. Mustafa, Süleyman Efendi b. Osman, Mehmed b. Ahmed, Ahmed b. Mustafa, Mustafa b. Receb.