Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 275 Hüküm no: 288 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan bt. Vartan’ın techiz ve tekfin masraflarıyla diğer hissedarların ücretini ödeyen Bogos v. Kabril’in terekenin sahibi olduğu Zikri âtî husûsun mahallinde ketb ü tahrîriʼçün bi’l-iltimâs savb-ı şer‘-i enverden irsâl olunan mevlânâ Yahya Efendi mahrûse-i Galata hâricinde Ketehorya nâm mahalde sâkine iken bundan akdem hâlike olan Sultan bt. Vartan v. Kazer nâm Ermeniyenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde hâlike-i mezbûrenin verâseti zevci Bogos v. Gabril babası mezbûr Vartan’a ve anası Aksapert bt. Mardiros’a münhasıra ve tashîh-i meseleleri bi-hükmi’l-ferâiz altı sehimden i‘tibâr olunup sihâm-ı mezbûreden üç sehmi mezbûr Bogos ve iki sehmi mezbûr Vartan’a ve bir sehmi merkūme Aksapert’e isâbeti tahakkukundan sonra mezbûr Vartan ile şahsı Baba Agya v. Asvador ve Karabet v. Kirkor ta‘rîfleriyle mu‘arrefe olan mezbûre Aksapert meclis-i ma‘kūd-ı mezbûrda tereke-i hâlike-i mezbûreye vâzı‘u’l-yed olan işbu bâ‘isü’l-vesîka mezbûr Bogos muvâcehesinden her biri bi’l-verâse ikrâr ve takrîr-i kelâm edip mûrisemiz hâlike-i mezbûrenin terekesi beynimizde bundan akdem ehl-i vukūf takvîmleriyle tahmîn ve takvîm olundukda mezbûre Sultan’ın mecmû‘ terekesi dört yüz beş guruş ve bir rub‘a bâliğ olup meblağ-ı mezbûrdan rızâ ve ittifâkımız ile masârıf-ı tahfîr ve tedvîni için elli guruş ve dellâliye sekiz guruş ve masârıf-ı sâire-i ma‘lûme için on guruş ki cem‘an altmış sekiz guruş ihrâc eylediğimizden sonra üç yüz yedi guruş ve bir rub‘ bâkī kalmağla tereke-i bâkiye-i mezbûreden tashîh-i mezbûr üzere bizim üç sehm hisselerimize yüz altmış sekiz buçuk guruş beş para ve mezbûr Bogos’un dahi kezâlik üç sehm hissesine yüz altmış sekiz buçuk guruş beş para isâbet etmeğin hâlâ biz zikr olunan sehimlerimize isâbet eden mikdâr-ı mezkûr hisselerimizi her birimiz ahz u istîfâ eylediğimizden sonra hâlike-i mezbûrenin terekesinden olup vasfı ve cinsi beynimizde ma‘lûm olan mârrü’z-zikr dört yüz beş <> guruş ve bir rub‘luk eşyânın ve aynlarına ve şer‘iyyelerine ve mezbûre Sultan’ın masârıf-ı defni için terekeden ihrâc olunan elli guruşa müte‘allika âmme-i da‘vâdan mezbûr Bogos’un zimmetini ibrâ ve ıskāt eyledik dediklerinde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Süleyman ve Muhzır Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Zilka‘deti’ş-şerîfe sene 1137. Şuhûdü’l-hâl: el-Hâc İbrahim Kethüdâ-yı Oturakcıyan, Berber Mehmed Beşe b. Abdullah, Çukadâr Süleyman Beşe, Mustafa Beşe b. Receb.