Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 276 Hüküm no: 289 Orijinal metin no: [41b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebabcı Abdullah Çelebi’nin borçlarına karşılık dükkanındaki eşyaları damadı Abdullah Beşe’ye satarak fazla kalan meblağı da tahsil ettiği Mahrûse-i Galata hâricinde Hoca Ali mahallesinde sâkin Kebabcı Abdullah Çelebi b. Abdullah b. Abdülmennân nâm kimesne tarafından husûs-ı âti’l-beyânı ikrâra vekîl olduğu Mehmed Çelebi b. Ahmed ve Ahmed Çelebi b. Mehmed nâm kimesneler şehâdetleriyle sâbit olan es-Seyyid Mustafa Çelebi b. es-Seyyid Mehmed meclis-i şer‘de müvekkil-i mezbûrun dâmâdı işbu sâhibü’l-kitâb Abdullah Beşe b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkil-i mezbûr Kebabcı Abdullah Çelebi gāib ani’l-meclis el-Hâc Ali nâm kimesneye üç yüz yetmiş beş guruş ve Uzun Ali Beşe’ye yetmiş beş guruş ve el-Hâc Ahmed[e]yüz yirmi guruş ve bir zimmîye on beş guruş ve bir kimesneye dahi üç guruş ve zevcesi Saliha Hâtun’a mehr-i mü’eccelinden yirmi beş guruş ve kızı Havva nâm hâtuna dahi iki guruş ki cem‘an eşhâs-ı mezbûreye altı yüz altmış üç guruş deyni olmağın müvekkil-i mezbûr Kebabcı Abdullah Çelebi hâlâ silk-i mülkümde münselik olup mahrûse-i mezbûre hâricinde kasaba-i Tophane’de merhûm Sultan Ahmed Hân -tâbe serâhu- Çeşmesi kurbundan vâki‘ kebâbcı ve hoşâbcı dükkânları derûnlarında mevcûd 1742 vakiyye bakır evânî ve 4 kırba tuc dirhemleri ve 400 aded demir kebâb şişimi ve 1 demir kanca ve 1 mikraz ve 1 demir fırın kapağı ve 2 satır ve 6 bıçak ve 1 demir kürek ve 15 ağaç kaşık ve 80 kemik kaşık ve 7 ağaç kova ve 3 destere ve 2 piştahta ve 2 toprak dağar ve 23 makramesini dâmâdı mezbûr Abdullah Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile ve safka-i vâhide ile yedi yüz guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yedi yüz guruşun altı yüz altmış üç guruşunu dâyinûn-ı merkūmûna def‘ u teslîme dâmâdı mezbûr Abdullah Beşe’ye emir ve tarafından tevkîl ve mâ‘adâsı olan otuz yedi guruşu dahi dâmâdı mezbûr Abdullah Beşe yedinden tamâmen ahz u kabz eyledi ba‘de’l-yevm eşyâ-yı muharrere-i mezbûrenin mecmû‘u mezbûr Abdullah Beşe’nin mülk-i müşterâsı olup müvekkil-i mezbûrun kat‘an alâka ve medhali kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Zilka‘deti’ş-şerîfe sene 1137. Şuhûdü’l-hâl: Mehmed b. İsmail vekîl-i harc, Mustafa Çelebi âlâtcı, Şerbetci Ali Çelebi kayyum, el-Hâc İsmail b. Mehmed berber, Cebeci Ali Beşe attâr, Ömer Çelebi b. Mustafa, Osman Çelebi b. Ahmed, Mehmed Çelebi b. Abdullah, Mustafa Beşe b. Mehmed Kalaycı, İbrahim Beşe b. Ahmed, İbrahim b. Mustafa, Mustafa b. Ahmed.