Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 277 Hüküm no: 290 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Süleyman’ın menzilinin Gülcami Vakfı tarafından satın alındığı Mahrûse-i Galata hâricinde Fındıklı kasabasında vâki‘ Perizat Hâtun mahallesi sâkinlerinden Mehmed Çelebi b. Süleyman nâm kimesne meclis-i şer‘de Rabia bt. Halil nâm hâtun mahzarında ikrâr ve takrîr-i kelâm edip mezbûre Rabia Hâtun’un mülkü olup kasaba-i Tophane’de Katib Mustafa Çelebi mahallesinde <>vâki‘ iki tarafdan Çiçekcikızı Fâtıma Hâtun Vakfı ve bir tarafdan Palaş zimmî veresesi mülkü ve bir tarafdan tarîk-i âm ile mahdûd fevkānî dört bâb oda <> ve iki sofa ve tahtânî dört bâb oda ve kenîf ve bi’r-i mâ ve bir mikdâr cüneyneyi müştemil mülk menzilini bâ-hüccet-i şer‘iyye yüz guruş mukābelesinde yedimde istiğlâl olunmağın hâlâ ben meblağ-ı mezbûr yüz guruş ile müşterî-i mezbûrun târih-i kitâba gelince müctemi‘a olan kalîl ve kesîr icâresini mezbûre Rabia Hâtun’dan yedinden tamâmen alıp kabz eyediğimden sonra menzil-i merkūmu istiğlâliyetden fekk ve tahlîs ve mezbûre Rabia Hâtun’a teslîm eylediğimde ol dahi ahz u tesellüm eyledi dedikde gıbbe’t-tasdîki’ş-şer‘î zâtı el-Hâc Mahmud b. Abdülkādir ve el-Hâc Ahmed b. Abdullah ta‘rîfleriyle mu‘arrefe olan mezbûre Rabia Hâtun dahi meclis-i mezkûrda ashâb-ı hayretden el-Hâc Mehmed b. Mustafa nâm kimesnenin mahmiye-i İstanbul’da Cibalikapısı dâhilinde vâki‘ Gülcâmi‘-i şerîfinde haftada bir kere Pazar günü ba‘de salâti’z-zuhr ta‘yîn eylediği va‘ziyyesi vakfının tevliyet ve tasarrufu ber-mûceb-i vakfiye hayâtda oldukca kendüye meşrûta olmağla hâlâ va‘ziyye-i merkūmenin ber-vech-i muharrer nükūd-ı mevkūfesine meşrûtiyyet üzere mütevellî olan mezbûr el-Hâc Mehmed tarafından ikrâr-ı câi’z-zikri tasdîke vekîli olduğu el-Hâc Hasan b. Ali ve Hasan Çelebi b. Mehmed şehâdetleriyle şer‘an sâbit olan işbu râfi‘u’l-vesîka el-Hâc Abdurrahman Ağa b. İsmail mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup bâlâda hudûd ve müştemilâtı zikr u beyân ve tafsîl ve ayân olan mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mütevellî-i mezbûr el-Hâc Mehmed’e üç yüz guruşa bey‘ ve teslîm eylediğimde ol dahi vakf-ı mezbûrun nükūd-ı mevkūfesini akāra tebdîle kıbel-i şer‘den me’zûn olmağla vakıf için bi’t-tevliye iştirâ ve tesellüm ve kabûl eyledikden sonra semeni olan meblağ-ı mezbûr üç yüz guruşu vakf-ı mezbûr mâlından olmak üzere mütevellî-i mezbûr el-Hâc Mehmed yedinden tamâmen alıp kabz eyledim fîmâ ba‘d menzil-i mahdûd-ı merkūm bi-cümletin mâ yeştemilühû ve yahvîhi va‘ziyye-i mezbûre musakkafâtından olup menzil-i merkūmda benim kat‘an alâka ve medhalim kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-gurre-i Zilhicceti’ş-şerîfe sene 1137. Şuhûdü’l-hâl: el-Hâc Osman b. el-Hâc Mustafa, el-Hâc Hasan b. Ali, Arusi Mustafa Efendi, Musa b. Mustafa, Osman b. Mustafa, Ali Ağa b. Mustafa, Osman Ağa b. Abdullah.