Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 278 Hüküm no: 291 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Sava’nın mülk bahçesini Lefter v. Sava’ya sattığı Fi’l-asl vilâyet-i Anadolu’da medîne-i Trabzon’da Urgancı mahallesi sükkânından olup hâlâ Galata’da abacı tâifesinden Yanaki v. Sava nâm zimmî meclis-i şer‘de sâbıku’z-zikr Urgancı mahallesi sükkânından Lefter v. Sava nâm zimmî tarafından şirâ-yı âti’z-zikre vekîl olduğu Anber v. Manol ve Yani v. Panayot nâm zimmiler şehâdetleriyle sâbit olan işbu râfi‘u’r-rakīm Tanaş v. Sava nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup medîne-i mezbûrede sâbıku’z-zikr Urgancı mahallesinde vâki‘ bir tarafdan Lefter nâm zimmî mülkü ve bir tarafdan kemer ve iki tarafdan tarîk-i âm ile mahdûd eşcâr-ı müsmire ve gayr-i müsmireli mülk bahçemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i [bâtt-ı] sahîh-i şer‘î ile müvekkil-i merkūm Lefter için vekîl-i merkūm Tanaş’a yirmi beş guruşa bey‘ u temlîk eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yirmi beş guruşu vekîl-i merkūm Tanaş yedinden tamâmen alıp kabz eyledim ve bahçe-i mezkûru mahallinde zabt ve tasarrufa müvekkil-i merkūm Lefter’i taslît eyledim ba‘de’l-yevm bahçe-i mezkûre merkūm Lefter’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ min-Zilhicceti’ş-şerîfe sene 1137. Şuhûdü’l-hâl: Ahmed Efendi kâtib-i mahkeme, Süleyman Efendi kâtib-i mahkeme, Mustafa Efendi b. Mehmed, İbrahim b. Mehmed, Ahmed Reis, Aşcı Salih Mehmed Reis, Süngerzâde İbrahim.