Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 798 Hüküm no: 1046 Orijinal metin no: [124a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ömer’in, ortağı Ali b. Mehmed ile hesaplaşıp alacağına bir müddet vade verdiği Tüccâr tâifesinden Mehmed b. Ömer nâm kimesne meclis-i şer‘-i hatîrde Ali b. Mehmed nâm kimesne mahzarında ikrâr ve takrîr-i kelâm edip merkūm Ali bundan akdem şerîkim olup fesh-i akd-i şirket edip beynimizde hesâb gördüğümüzde ba‘de külli hesâb mâl-ı şirket-i mezbûrdan merkūm Ali kırk esedî guruşu kendi mesârifine sarfla istihlâk edip zimmetinde kalmağın meblağ-ı mezbûru merkūm Ali’den da‘vâ eylediğimde ol dahi inkâr etmeğin beynimizde münâza‘ât-ı kesîre vukū‘undan sonra beynimize muslihûn tavassut edip meblağ-ı mezbûr da‘vâsından merkūm Ali ile otuz esedî guruş üzerine sulh eylediklerinde ben dahi sulh-i mezbûru kabûl edip lâkin bedel-i sulh-i mezkûru merkūm Ali’nin edâya iktidârı olmayıp te’cîle tâlib olmağın meblağ-ı merkūm otuz esedî guruşu târih-i kitâbdan elli gün tamâmına değin te’cîl eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Beşe el-Mübâşir, İbrahim Çelebi b. Ahmed, Mehmed b. Ramazan, Resul [b.] Rıdvan.