Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 278 Hüküm no: 292 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçik v. David’in mülk mahzenini Serkis v. Mardiros’a sattığı Mahrûse-i Galata muzâfâtından Kapıdağı nâhiyesine tâbi‘ Bandırma kasabası sükkânından Haçik v. David nâm Ermeni meclis-i şer‘de işbu hâmilü’s-sifr Serkis v. Mardiros nâm Ermeni muvâcehesinde ikrâr ve takrîr-i kelâm edip merkūm Serkis’e cihet-i karz-ı şer‘îden zimmetimde yüz altmış guruş deynim olmağla akd-i âtî sudûruna değin silk-i mülkümde münselik olup kasaba-i mezbûrede vâki‘ bir tarafdan Mehmed Ağa mülkü ve bir tarafdan Zeynelabidin mülkü ve bir tarafdan Topal Manol mülkü ve bir tarafdan tarîk-i âm ile mahdûd bir bâb mülk mahzenimi merkūm Serkis’e tarafeynden îcâb ve kabûlü havî bey‘-i bâtt-ı sahîh-i şer‘î ile yüz altmış guruşa bey‘ u temlîk ve mahallinde teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûru deynim olan yüz altmış guruşa takās eylediğimde ol dahi mukāssa ve kabûl etmeğin ba‘de’l-yevm mahzen-i mahdûd-ı merkūm mersûm Serkis’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Zilhicceti’ş-şerîfe sene 1137. Şuhûdü’l-hâl: İbrahim b. Muharrem, Halil Çelebi b. Mustafa, Bekir b. Hüseyin, Mehmed b. Halil, Ahmed b. Mustafa, Ağyazar v. Mosek, Nikegos v. Vaknan.