Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 279 Hüküm no: 293 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fahri bt. Mustafa’nın Ali Bey b. Hüseyin’den nafaka alacağı El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîne-i Galata -gufira lehû-. Mahrûse-i Galata’ya tâbi‘ Kasaba-i Kasımpaşa’da Eyyühüm? mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Fahri bt. Mustafa nâm hâtun meclis-i şer‘de zevc-i muhâlı‘ı Ali Bey b. Hüseyin mahzarında takrîr-i kelâm edip mezbûr Ali Bey’in firâşından hâsıl ve benden mütevellide bi-hükmi’l-hıdâne hacr ve terbiyemde olan sagīre kızı Nefise’nin el-yevm nafaka ve kisveye zarûret ve ihtiyâcı olmağın mezbûre Nefise’nin nafaka ve kisvesiʼçün babası mezbûr Ali Bey üzerine kıbel-i şer‘den kadr-i kifâye meblağ farz ve takdîr olunması matlûbumdur dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri dahi tarafeynin rızâlarıyla sagīre-i mezbûrenin nafaka ve kisve ve levâzım-ı zarûriyyesiʼçün babası mezbûr Ali Bey üzerine târih-i kitâbdan külle yevmin birer para farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisve ve levâzım-ı zarûriyyesine harc ve sarfa ve lede’l-iktizâ istidâneye ve inde’z-zafer mezbûr Ali Bey üzerine rücû‘a mezbûre Fahri Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fî-gurre-i Zilhicce sene 1137. Şuhûdü’l-hâl: Âlâtcı Abdullah Çelebi, İbrahim b. Mustafa, Mustafa b. Receb, Serbölük Halil Çelebi, Bursalı Mehmed.