Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 280 Hüküm no: 295 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Mehmed’in kocası el-Hâc Mustafa ile sakin olduğu menzilindeki eşyalarını annesi Fatıma bt. Mustafa’ya sattığı Mahrûse-i Galata muzâfâtından kasaba-i Tophane’de Ekmekcibaşı mahallesinde sâkine ve zâtı Mehmed Çelebi b. Mehmed ve Ali Çelebi b. Mehmed nâm kimesneler ta‘rîfleriyle mu‘arrefe olan Zeyneb bt. Mehmed nâm hâtun meclis-i şer‘de anası işbu râfi‘atü’l-vesîka Fâtıma bt. Mustafa nâm hâtun mahzarında bi-tav‘ihâ ikrâr ve takrîr-i kelâm edip hâlâ silk-i mülkümde münselik olup zevcim el-Hâc Mustafa ile sâkin olduğum menzil derûnunda mevcûd olan eşyâ-yı memlûkemden bir orta keçesi ve üç yan keçesi ve üç minder ve yedi çatma yasdık ve bir kaliçe seccâde ve bir molla ocak yaşmağı ve bir çuka kapı perdesi ve üç yemenî ve bir sandal yorgan ve iki beledî döşek ve on kat çamaşır ve bir inci kuşak ve bir sîm kuşak ve bir çift zümrüd küpe ve bir molla sarık örtüsü ve altı molla abdest makremesi ve on iki uçkur ve üç kat giyim esbâbı ve üç döşek çârşebi ve bir peşkir ve bir işleme sofra ve beş mantâri bohça ve bir kebîr sini ve bir sagīr sini ve bir gügüm ve bir tâbe ve bir leğen ibrik ve üç tencere ve on sahan ve beş sagīr lenger ve iki kahve ibriği ve bir kahve tepsisi ve iki şamdan ve bir iskemle ve bir hoşâb tası ve bir hamâm tası ve bir kil kutusu ve bir faraş ve bir işleme molla yemenî ve üç çuka serpuş ve iki ayaklı sandığımı anam mezbûre Fâtıma Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile yüz guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûra müte‘allika âmme-i da‘vâdan anam mezbûre Fâtıma Hâtun’un zimmetini ibrâ ve ıskāt eyledim ba‘de’l-yevm eşyâ-yı muharrere-i mezkûre anam mezkûre Fâtıma Hâtun’un mülk-i müşterâsı olmuşdur keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ aşer min-Zilka‘deti’ş-şerîfe sene 1137. Şuhûdü’l-hâl: es-Seyyid Hüseyin Çelebi b. Ahmed, Mehmed Çelebi b. Mehmed, Ali Çelebi b. Mehmed, el-Hâc Mehmed b. Mehmed, Ali Çelebi b. Ömer, Halil Çelebi b. Mustafa, Mustafa b. Ahmed.