Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 281 Hüküm no: 296 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın küçük kızı Meryem ile kendisini bırakıp giden kocası Mustafa b. Hasan’dan nafaka alacağı Mahrûse-i Galata muzâfâtından kasaba-i Tophane‘de Firuzağa mahallesinde sâkine işbu râfi‘atü’l-vesîka Âişe bt. Mustafa nâm hâtun zâtı ba‘de’t-ta‘rîfi’ş-şer‘î meclis-i şer‘de takrîr-i kelâm ve ta‘bîr ani’l-merâm edip zevcim gāib ani’l-beled Mustafa b. Hasan b. Abdurrahman bundan akdem beni ve benden mütevellide sagīre kızı Meryem’i bilâ nafaka terk ve diyâr-ı âhara revâne olup ve nafaka cinsinden bir nesne irsâl etmeyip nafakaya ihtiyâcımız olmağın bizim için zevcim gāib-i mezbûr Mustafa üzerine kıbel-i şer‘den kadr-i kifâye meblağ farz ve takdîr olunması matlûbumdur deyü iş‘âr etmeğin hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- efendi hazretleri dahi mezbûre Âişe Hâtun’u ba‘de’t-tahlîfi’ş-şer‘î mezbûre Âişe Hâtun ile sagīre-i mezbûre Meryem’in nafakalarıʼçün târih-i kitâbdan yevmî dokuz akçe farz ve takdîr eyleyip meblağ-ı mefrûz-ı mezbûru kendi ile sagīre-i mezbûrenin nafakalarına harc ve sarfa ve lede’l-iktizâ istidâneye ve inde’z-zafer zevci gāib-i mezbûr üzerine rücû‘a mezbûre Âişe Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ aşer min-Zilhicceti’ş-şerîfe sene 1137. Şuhûdü’l-hâl: Süleyman Efendi b. Osman, Mustafa Efendi b. Mehmed, Molla İbrahim el-mukayyid, Halil Çelebi b. Mustafa, İbrahim Çelebi b. Mustafa.