Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 281 Hüküm no: 297 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mustafa b. İbrahim’in menzilini Fatıma bt. el-Hâc Mustafa’ya sattığı Mahrûse-i Galata muzâfâtından kasaba-i Tophane’de Muhyiddin Efendi mahallesinde sâkin el-Hâc Mustafa b. İbrahim b. Abdülkerîm nâm kimesne tarafından bey‘-i âti’z-zikri ikrâra vekîli olduğu Yahya Çelebi b. İsmail ve Osman Çelebi b. Hızır nâm kimesneler şehâdetleriyle sâbit olan el-Hâc Hasan b. Mehmed nâm kimesne meclis-i şer‘de müvekkil-i mezbûrun sulbiye kebîre kızı olup mahalle-i mezbûrede sâkine Fâtıma bt. el-Hâc Mustafa b. İbrahim nâm hâtun tarafından ikrâr-ı âti’z-zikri tasdîke vekîl-i şer‘îsi olan işbu sâhibü’l-kitâb Mehmed Çelebi b. Yahya nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûr el-Hâc Mustafa akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan Lüleci Ömer menzili ve iki tarafdan ba‘zen İplikci İsmail ve ba‘zen Deli Ahmed ve ba‘zen Rahime ve ba‘zen Gülistan nâm hâtunlar menzilleri ve bir tarafdan tarîk-i hâs ile mahdûd fevkānî üç bâb oda ve bir sofa ve dehlîz ve abdesthâne ve tahtânî iki bâb oda ve dehlîz ve kenîf ve bi’r-i mâ ve ardında bir mikdâr bahçe ve önünde bir mikdâr arsa-i hâliyeli ve def‘a fevkānî bir bâb çatma oda ve dehlîz ve tahtında bir bâb odayı müştemil mülk menzilde olan nısf hisse-i şâyi‘amı kızı müvekkile-i mezbûre Fâtıma’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz guruşa bey u temlîk ve teslîm <> eyledikde ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezbûr iki yüz guruşu müvekkile-i mezbûre Fâtıma yedinden tamâmen ahz u kabz eyledikden sonra semeni olan meblağ-ı mezbûrun gabn ve tağrîrine müte‘allika âmme-i da‘vâdan kızı müvekkile-i mezbûrenin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi ba‘de’l-yevm menzil-i mahdûd-ı mezkûrun nısf-ı şâyi‘i müvekile-i mezbûre Fâtıma Hâtun’un mülk-i müşterâsı olmuşdur keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-Zilhicceti’ş-şerîfe sene 1137. Şuhûdü’l-hâl: Mehmed Çelebi b. Yahya, Mehmed Usta b. Mustafa, Ahmed Çelebi b. Hasan berber, es-Seyyid Ahmed Çelebi b. es-Seyyid Mahmud, İbrahim Çelebi b. Muharrem, Halil Çelebi b. Mustafa.