Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 283 Hüküm no: 299 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. İsmail’in Mehmed b. Abdullah’dan nafaka alacağı Mahrûse-i Galata’da Şehsuvar mahallesinde sâkine işbu râfi‘atü’l-vesîka Hadice bt. İsmail nâm hâtun zâtı ba‘de’t-ta‘rîfi’ş-şer‘î mahfil-i şer‘de takrîr-i kelâm ve ta‘bîr ani’l-merâm edip mîrî kalyonlardan Kapudân-ı hümâyûn neferâtından olup zevcim olup gāib ani’l-beled Mehmed b. Abdullah nâm kimesne beni bilâ nafaka terk edip ve nafaka cinsinden bir nesne dahi göndermediği ecilden hâlâ nafaka ve kisve bahâya kemâl-i mertebe ihtiyâcım olmağla zevcim gāib-i merkūm üzerine kıbel-i şer‘den kadr-i kifâye meblağ farz ve takdîr olunması murâdımdır dedikde ve hâl vech-i muharrer üzere olduğunu zeyl-i vesîkada isimleri muharrer olan bî-garaz sikāt-ı muvahhidîn dahi ihbâr etmeleriyle hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- efendi dahi mezbûre Hadice Hâtun’u ber-nehc-i şer‘î ba‘de’t-tahlîfi’ş-şer‘î mezbûrenin nafaka ve kisve ve levâzım-ı zarûriyye-i sâiresiʼçün zevci gāib-i mezbûr üzerine târih-i kitâbdan yevmî sekizer akçe farz ve takdîr eyleyip meblağ-ı mefrûz-ı mezkûru nafaka ve kisve ve levâzım-ı zarûriyye-i sâiresine harc ve sarfa ve lede’l-hâce istidâneye ve ınde’z-zafer zevci gāib-i mezbûr üzerine rücû‘a mezbûre Hadice Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ aşer min-Zilhicceti’ş-şerîfe sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Süleyman Efendi b. Osman, İbrahim b. Mustafa, Mehmed b. Ahmed, Mustafa b. Ahmed, Ali b. Abdullah.