Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 286 Hüküm no: 305 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın kocası Ali b. Mehmed’den doğacak çocuğunun nafakasına kefil olarak boşandığı Mahrûse-i Galata muzâfâtından kasaba-i Beşiktaş‘da Maçka mahallesinde sâkine Âişe bt. Mustafa nâm hâtun ile ba‘de’t-ta‘rîfi’ş-şer‘î meclis-i şer‘de zevc-i muhâlı‘ı işbu râfi‘u’l-kitâb Ali b. Mehmed nâm kimesne mahzarında ikrâr ve takrîr-i kelâm edip zevcim mezbûr Ali ile beynimizde hüsn-i zindegânemiz olmayıp hul‘a tâlibe ve râgıbe olduğum cihetle zimmetinde mütekarrır ve ma‘kūdün-aleyh olan iki bin beş yüz akçe mehr-i mü’eccelimden fâriğa olup ve mezbûrun firâşından hâlâ batnımda hamlim olup iddetim vaz‘-ı haml ile munkazıye olmağın nafaka-i iddet ve me’ûnet-i süknâm dahi kendi üzerime olup ve vaz‘-ı haml eylediğimde zuhûra gelen veled gerek erkek ve gerek dişi hakk-ı hıdâne sükūtuna değin kendi mâlımdan teberru‘an infâk ve iksâ etmek üzere zevcim mezbûr Ali ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i muzbûru ba‘de’l-kabûl hukūk-ı zevciyyete vesâire müte‘allika âmme-i da‘vâ ve mutâlebât ve eymân ve muhâsamâtdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mezbûre Âişe Hâtun’un karındaşı Halil b. Mustafa meclis-i mezbûrda mezbûr Ali mahzarında ikrâr ve takrîr-i kelâm edip eğer kız karındaşım mezbûre Âişe Hâtun ba‘de zamânin zuhûra gelen veledi mezbûr Ali üzerine her ne mikdâr nafaka farz ve takdîr etdirirse meblağ-ı mefrûz-ı mezkûra kefîl ve dāminim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-Zilhicceti’ş-şerîfe sene 1137. Şuhûdü’l-hâl: Mehmed Çelebi b. Mustafa, İbrahim b. Muharrem, Halil Çelebi b. Mustafa, Mustafa b. Receb, Molla Mehmed b. Yusuf, Mustafa b. Ahmed, Mehmed b. Ahmed.