Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 287 Hüküm no: 306 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Okcu Musa mahallesi avarızına mütevelli Kadızade Ali Çelebi’nin vefatıyla Cemal Paşazade el-Hâc Ahmed’in mütevelli tayin edildiği Mâ fîhi mine’n-nasb ve’t-ta‘yîn nemakahu’l-fakīr ileyhi sübhânehû el-Hâc Mustafa el-Kādî bi-medîne-i Galata. Mahrûse-i Galata’da vâki‘Okcu Musa mahallesi avârızına mevkūfe nükūdun mütevellîsi olan Kadızâde Ali Çelebi b. Muharrem Efendi fevt olmağla nükūd-ı mevkūfe-i mezbûreye bir mütevellî nasbından lâ-büd olmağın yine mahalle-i mezbûrede vâki‘ mescid-i şerîf vakfının mütevellîsi olup mu‘temed ve müstakīm ve her vechile hizmet-i mezbûre uhdesinden gelmeğe kādir olduğundan mâ‘adâ mahalle-i mezbûre ahâlîsinin marzî ve muhtârları olan işbu râfi‘u’l-kitâb Cemal Paşazâde el-Hâc Ahmed b. Mehmed nâm kimesne kıbel-i şerî‘at-ı garrâdan nükūd-ı mevkūfe-i mezbûreye hasbî mütevellî nasb ve ta‘yîn olundukda ol dahi ber-vech-i muharrer tevliyet-i mezbûreyi kabûl ve hıdemât-ı lâzimesini ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Zilhicceti’ş-şerîfe sene 1137. Şuhûdü’l-hâl: Molla Ali b. Mahmud İmâm, el-Hâc Ahmed b. Abdullah, el-Hâc Mustafa b. İbrahim, el-Hâc Mehmed b. Ali, Ahmed Çelebi b. Mehmed, el-Hâc İbrahim b. Hüseyin, Mustafa Çelebi b. Mehmed, Salih Çelebi b. Mehmed, Hüseyin Çelebi b. Mustafa, Hüseyin b. Halil, el-Hâc Abdullah b. Abdullah.