Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 287 Hüküm no: 307 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Yusuf b. Ahmed’in vakfiyesi Mâ fîhi mine’l-vakfi ve’ş-şurûti cerâ küllühû ledeyye ve vaka‘a cemî‘uhû beyne yedeyye ve innî hakemtü bi’s-sıhhati ve’l-lüzûmi fi’l-husûs ve’l-umûm âlimen bi’l-hilâfi’l-cârî beyne’l-eimmeti’l-eslâf ve ene’l-fakīr ileyhi sübhânehû ve te‘âlâ es-Seyyid Yahya b. es-Seyyid Mehmed el-Hasenî el-müvellâ hilâfeten bi-medîne-i Galata -gufira lehû-. El-hamdü li-veliyyihî ve’s-salâtü alâ-nebiyyihî ve alâ-âlihî ve sahbihî emmâ ba‘d işbu kitâb-ı sıhhat-nisâbın tahrîr ve imlâsına bâ‘is ve bâdî oldur ki mahrûse-i Galata’da Kara Mustafapaşa mahallesinde sâkin sâhibü’l-hayrât el-Hâc Yusuf b. Ahmed meclis-i şer‘-i şerîf-i nebevîde vakf-ı âti’z-zikri li-ecli’t-tescîl mütevellî nasb eylediği el-Hâc Mehmed b. Mehmed mahzarında ikrâr ve i‘tirâf edip vilâyet-i Anadolu’da Yenişehir kazâsına tâbi‘ Akburun nâm karyede vâki‘ bir tarafdan Bâlioğlu Mehmed mülkü ve bir tarafdan Mahmud nâm kimesne mülkü ve bir tarafdan Şeyhoğlu Mehmed mülkü ve taraf-ı râbi‘den tarîk-i âm ile mahdûd tahtânî bir bâb oda ve bir saman-hâne ve bir ahuru müştemil mülk menzil ile yine karye-i mezbûrede vâki‘ etrâf-ı erba‘ası Ali Beşe bağı ve sahrâ ve tarîk-i âm ile mahdûd kayısılı bağ demeğle ma‘rûf kürûmu mülk bağımın kürûmunu hasbeten lillâhi te‘âlâ vakf-ı sahîh-i mü’eyyed ile vakf ve habs edip şöyle şart eyledim ki menzil-i merkūm ile bağ-ı mezbûrun tevliyet ve süknâ ve tasarruf ve menâfi‘i zikr olunan Akberon karyesinde mukaddemâ ta‘mîr ve ihyâ eylediğim câmi‘-i şerîfimde imâm ve hatîb olanlara meşrûta ola ve mürûr-ı eyyâm ile şart-ı mezbûra ri‘âyet müte‘azzire olursa galle-i vakıf mutlaka fukarâ-i Müslimîne harc ve sarf oluna deyü ta‘yîn-i kuyûd eylediğimden sonra fâriğan ani’ş-şevâgil menzil-i mezbûr ile bağ-ı merkūmu bundan akdem mahallinde zabt ve tasarrufa mütevellî-i mezbûru tarafımdan taslît edip ol dahi mahall-i mezbûra varıp sâir evkāf mütevellîleri evkāfda eyledikleri tasarruf gibi zabt ve tasarruf etmiş idi dedikde gıbbe’t-tasdîki’ş-şer‘î vâkıf-ı mezbûr semt-i vifâktan cânib-i şikāka azîmet edip eğer ki vakf-ı akār İmâm-ı A‘zam radıyallâhü anhü hazretleri katında sahîhdir lâkin sıhhat müstelzime olmayıp ve arz-ı mîrî üzerinde gars olunan eşcârın cihet-i uhrâya vakfı eimme-i kirâm katlarında câiz olmamağın menzil-i mezbûr ile bağ-ı merkūmun vakıflarından rücû‘ ve ke’l-evvel mülküme istirdâda şurû‘ eyledim mütevellî-i mezbûrdan suâl olunup teslîme tenbîh olunması murâdımdır dedikde gıbbe’s-suâl mütevellî-i mezbûr cevâbında eğer ki hâl bast olunan minvâl üzeredir lâkin imâmeyn-i hümâmeyn hazretleri katlarında sıhhat lüzûmu müstelzime olup ve arz-ı mîrî üzerinde mağrûse olup cihet-i uhrâya vakıf olan eşcârın dahi vakfı ba‘z-ı eimme-i kirâm katlarında sahîhdir deyü red ve teslîmden imtinâ‘ edip hâkim-i muvakkı‘-ı a‘le’l-kitâb hazretleri huzûrunda müterâfi‘ân ve her biri mübtegāsınca fasl ü hasma tâlibân olduklarında hâkim-i müşârun-ileyh dahi zikr olunan menzil vakfının İmâm-ı A‘zam re’yi üzere sıhhatine ve arz-ı mîrî üzerinde magrûse olan eşcâr vakfının dahi alâ-kavli men yerâhu min-eimmeti’l-kibâr sıhhatine ve menzil-i mezbûr ile lüzûm-ı merkūm vakfının imâmeyn-i hümâmeyn hazretleri mezheb-i şerîfleri üzere lüzûmuna hükmetmeğin ba‘de’l-yevm evkāf-ı mezbûrenin mecmû‘u vakf-ı sahîh ve lâzım olup nakz ve nakzına mecâl mümteni‘u’l-ihtimâl oldu cerâ zâlik. Ve hurrire fi’l-yevmi’s-sânî ve’l-ışrîn min-Zilhicceti’ş-şerîfe li-sene seb‘a ve selâsîn ve mi’e ve elf. Şuhûdü’l-hâl: İmâm Mehmed Efendi, Mustafa b. Ahmed, Mehmed b. Ahmed, İbrahim b. Mustafa, İbrahim Çelebi, el-Hâc Mahmud, Hammâmî Ali Çelebi, Hammâmî Ali Çelebi, Boyacı Mehmed Çelebi, Kayyumoğlu Hacı Mustafa, Sandıkcı el-Hâc Hasan.