Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 289 Hüküm no: 308 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hürmüz v. Manol’un Beykoz ve Kadıköy’deki dalyanlarda olan hisselerinin Yanaki v. Nikola’ya satıldığı Mahrûse-i Galata a‘mâlinden Beşiktaş nâhiyesine tâbi‘ Arnavud nâm karyesi sâkinlerinden iken bundan akdem medyûnen hâlik olan Hürmüz v. Manol v. Panayot nâm zimmînin verâseti zevce-i metrûkesi Zoli nâm Nasrâniye ile kebîr oğlu Yanaki ve kebîre kızı Maryore Nasrâniyeye ve sagīr oğulları Kostantin ve Mihal’e münhasıra olup ve merkūme Zoli evlâdı sagīrân-ı merkūmânın tesviye-i umûrlarına rü’yete bâ-hüccet-i şer‘iyye kıbel-i şer‘den mansûbe vasîler olduğu lede’ş-şer‘i’l-enver zâhir ve müte‘ayyin oldukdan sonra merkūm Yanaki asâleten ve merkūme Maryore tarafından bey‘-i câi’z-zikri ikrâra vekîli olduğu merkūmenin şahsını ma‘rifet-i şer‘iyye ile ârifân Nikola v. Dimitri ve Yenaki v. İstemat nâm zimmîler şehâdeteriyle şer‘an sâbit olan Vasil v. Zaferi nâm zimmî vekâleten ve vasiye-i merkūme Zoli’nin babası ve tarafından bey‘-i âti’l-beyânı ikrâra vekîli olduğu şahs-ı merkūmu ma‘rifet-i şer‘iyye ile ârifân İbrahim Çelebi b. Ahmed ve Hüseyin Çelebi b. Ahmed nâm kimesneler şehâdetleriyle şer‘an sâbit olan Dimitri v. Kalandos nâm zimmî vekâleten meclis-i şer‘de işbu hâmilü’r-rakīm Yanaki v. Nikola nâm zimmî muvâcehesinde her biri bi’l-asâle ve bi’l-vekâle ikrâr ve takrîr-i kelâm edip hâlik-i merkūm Hürmüz’ün eşhâs-ı ma‘lûmeye olan düyûn-ı müteferrika-i müsbitesiʼçün tereke-i mevcûdesinin âhara bey‘i şer‘an lâzım geldiğinden mâ‘adâ sagīrân-ı merkūmân Kostantin ve Mihal’in nafaka ve kisve bahâya kemâl-i mertebe zarûret ve ihtiyâcları olup ve Yoros kazâsına tâbi‘ Beykoz karyesi önünde vâki‘ baş ve orta dalyanlar demeğle ma‘rûf iki aded dalyânlarile Üsküdar kazâsı muzâfâtından Kādı karyesine karîb Modaburnu’nda ve Kilyos nâm mahalde vâki‘ birer ocak mülk dalyanların on sehimden bir sehm ve bir çâr-yek sehimi hâlik-i merkūm Hürmüz’ün ile’l-helâk yedinde mülkü olmağla biz dahi hâlik-i merkūmun mârrü’z-zikr dalyanlarda olan mikdâr-ı mezkûr hissesini izn-i şer‘ ve münâdî yediyle bey‘a arz ve sûk-ı sultânîde kirâren ve mirâren nidâ ve müzâyede ettirdiğimizde hisse-i merkūme mersûm Yanaki üzerinde dört yüz guruşda edip ve ziyâde ile tâlib-i âharı olmayıp ragabât-ı nâs bi’l-külliye munkatı‘a olup ve meblağ-ı merkūm el-yevm hisse-i merkūmenin el-yevm semen-i misli idiği zeyl-i vesîkada isimleri muharrer olan bî-garaz ehl-i vukūf Müslimîn ihbârlarıyla lede’ş-şer‘ zâhir olmağın müvekkiletân-ı merkūmetân Maryore ve Zoli dahi asâlet ve vesayet-i mahkiyelerimiz hasebiyle hâlik-i merkūmun zikr olunan dalyanlarda olan on sehimde bir sehm ve çâr-yek sehm hissesini tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Yenaki’ye dört yüz guruşa bey‘ u teslîm ve temlîk eylediğimde ol dahi ber-minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûru her birimiz bi’l-asâle ve bi’l-vekâle müşterî-i merkūm Yanaki yedinden tamâmen alıp kabz eyledik ba‘de’l-yevm zikirleri sebk eden dalyanlarda olan on sehimde bir sehm ve bir çâr-yek sehm hisse-i merkūm Yenaki’nin mülk-i müşterâsıdır keyfe mâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-Zilhicceti’ş-şerîfe sene 1137. Şuhûdü’l-hâl: el-Hâc Mustafa Efendi el-imâm, Arusi Mustafa Efendi, İbrahim Çelebi b. Ahmed, Hüseyin Çelebi b. Ahmed, Hasan Beşe b. Davud, Hüseyin Beşe b. Mustafa, Kapıcı Mustafa, Halil Beşe b. Ahmed, İbrahim b. Mustafa, Bursalı Mehmed b. Ahmed.