Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 290 Hüküm no: 309 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mismari Ahmed Çelebi’nin vakıf menziline Mustafa Efendi b. el-Hâc İbrahim mutasarrıf iken vefat ettiğinden Molla İbrahim’e tevcih edildiği Mâ fîhi mine’t-tevcîh sadara minnî nemakahü’l-fakīr ileyhi sübhânehû el-Hâc Mustafa el-Kādı bi-medîneti Galata -gufira lehû-. Mahrûse-i Galata a‘mâlinden kasaba-i Kasımpaşa’da vâki‘ Küçük Piyalepaşa mahallesinde sâkin iken bundan akdem vefât eden merhûm Mismari Ahmed Çelebi nâm sâhibü’l-hayrın mahalle-i merkūmede vâki‘ tarafeynden el-Hâc Ahmed veresesi mülkleri ve bir tarafdan Fazlı Efendi mülkü ve bir tarafdan tarîk-i âm ile mahdûd fevkānî iki bâb oda ve bir sofa ve kenîf ve tahtânî bir bâb oda ve bi’r-i mâ ve kenîf ve bir mikdâr bahçeyi müştemil vakf ettiği menzilinin süknâ ve tasarrufunu ber-mûceb-i vakfiye-i şer‘iyye evvelâ kendi nefsine ba‘de vefâtihî zevcesi Raziye nâm hâtuna ve ba‘de vefâtihâ Mehmed Efendi nâm kimesneye ba‘de vefâtihî re’y-i hâkimi’ş-şer‘le ulemâdan olup süknâya muhtâc olan bir recül-i sâliha şart ve ta‘yîn edip hâlâ meşrûtün-lehüm bi’l-külliye münkariz olmalarıyla menzil-i merkūm ulemâ ve sulehâdan Mustafa Efendi b. el-Hâc İbrahim’e mukaddemâ tevcîhe hâkimü’ş-şer‘de bâ-hüccet-i şer‘iyye tevcîh olunup ber-mûceb-i şart-ı vâkıf mutasarrıf iken mezbûr Mustafa Efendi dahi fevt olmağın hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- efendi hazretleri dahi menzil-i mevkūf-ı merkūmu müteveffâ-yı mezbûrun sulbî oğlu olup talebe-i ulûmdan her vechile süknâya muhtâc olan bâ‘isü hâze’l-kitâb Molla İbrahim’e tevcîh etmeğin işbu vesîka-i enîka li-ecli’s-senedi’s-sedîd ketb olundu. Fi’l-yevmi’s-sâlis ve’l-ışrîn min-Zilhicceti’ş-şerîfe sene 1137. Şuhûdü’l-hâl: Halil Efendi b. Hüseyin, Arusi Mustafa Efendi b. Hasan, Süleyman Efendi b. Osman, Mustafa Efendi b. Mehmed, Çukadâr el-Hâc Mehmed, Serbölük İbrahim Çelebi.