Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 291 Hüküm no: 310 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’e babası Mehmed tarafından nafaka ödenmesi Mahrûse-i Galata’da el-Hâc A‘mâ mahallesinde sâkine Emine bt. Mehmed nâm sagīrenin anası Fâtıma bt. Osman nâm hâtunun hâne-berdûş olup babası mezbûr Mehmed dahi diyâr-ı âharda olduğu İbrahim b. Mustafa ve Halil Çelebi b. Mustafa ve Mustafa Beşe b. Receb ve Mehmed b. Ahmed nâm kimesneler ihbârlarıyla lede’ş-şer‘i’l-enver zâhir ve mukarrer oldukdan sonra sagīre-i mezbûrenin min-kıbeli’l-üm ceddesi olup mahalle-i mezbûrede sâkine işbu râfi‘atü’l-vesîka Âişe bt. Mustafa nâm hâtun meclis-i şer‘de takrîr-i kelâm ve ta‘bîr ani’l-merâm edip hâlâ hacr ve terbiyemde olan sagīre-i mezbûre Emine’nin nafaka ve kisveye eşed ve ihtiyâcı olmağla sagīre-i mezbûre Emine’nin nafaka ve kisvesiʼçün babası mezbûr Mehmed üzerine kıbel-i şerî‘at-ı garrâdan kadr-i ma‘rûf meblağ farz ve takdîr olunmak matlûbumdur dedikde hâkim-i muvakkı‘-ı a‘le’l-kitâb tûbâ-lehû ve hüsnü-meâb efendi hazretleri dahi sagīre-i mezbûrenin nafaka ve kisve ve levâzım-ı zarûriyyesiʼçün babası gāib-i mezbûr Mehmed üzerine târih-i kitâbdan külle yevmin altışar akçe farz ve takdîr eyleyip ve meblağ-ı mefrûz-ı mezkûru sagīre-i mezbûrenin nafaka ve kisve vesâir havâic-i zarûriyyesine harc ve sarfa ve lede’l-iktizâ istidâneye ve inde’z-zafer babası gāib-i mezbûr Mehmed üzerine rücû‘a mezbûre Âişe Hâtun’a izin verilmeğin mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe sene 1137. Şuhûdü’l-hâl: Ali b. Abdullah, Bekir b. Hüseyin, Halil Çelebi b. Mustafa, İbrahim b. Mustafa, Mehmed b. Ahmed, Süleyman Efendi ve gayrühum