Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 291 Hüküm no: 311 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkcü Nikola v. Yorgi’nin mülk menzilini vefatından önce kardeşi Eleni bt. Yorgi’ye sattığı El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîneti Galata -afâ anhu-. Mahmiye-i İstanbul’da Kumkapı dâhilinde sâkin Mehmed Ağa b. Mustafa meclis-i şer‘de mahrûse-i Galata hâricinde Kamer Hâtun mahallesinde sâkine olup zikri âtî menzile vâzı‘atü’l-yed olan işbu bâ‘isetü’l-vesîka Eleni bt. Yorgi muvâcehesinde üzerine da‘vâ ve takrîr-i kelâm edip mezbûre Eleni karındaşı olup mahalle-i mezbûre sükkânından iken târih-i kitâbdan dört sene mukaddem hâlik olan Kürkcü Nikola v. Yorgi v. Yani hâl-i hayâtında helâkinden sekiz ay mukaddem yedinde mülkü olup mahalle-i mezbûrede vâki‘ etrâf-ı erba‘ası Haknorya v. Dekarlo ve Mavridioğluve Hacı ve tarîk-i âm ile mahdûd fevkānî üç bâb oda ve bir sofa ve dehlîz ve kenîf ve tahtânî iki bâb oda ve bir sofa ve matbah ve dehlîz ve kenîf ve bi’r-i mâ ve bahçe ve arsa-i hâliyeyi müştemil mülk menzilini bana altı yüz otuz guruş semen-i medfû‘ ve makbûza bey‘ etmiş iken merkūme Eleni menzil-i mezbûru fuzûlî zabt ve tasarruf ile suâl olunup ba‘de kasri’l-yed teslîme tenbîh olunması murâdımdır dedikde gıbbe’s-suâl merkūme Eleni cevâbında karındaşım hâlik-i mezbûr Kürkcü Nikola hâl-i hayâtında iki sene mukaddem işbu yedimde olan bin yüz otuz bir senesi Zilka‘desi on beşinci günü târihiyle muvarrah mübâya‘a hücceti nâtık olduğu üzere menzil-i mezbûru bana dokuz yüz altmış guruş semen-i medfû‘ ve makbûza bey‘ etmeğle menzil-i merkūm târih-i mezbûrdan beri mülk-i müşterâm olduğuna binâen zabt ve tasarruf ederim deyü def‘le mukābele edicek gıbbe’l-istintâk ve akībe’l-inkâr merkūme Eleni’den def‘-i mezbûrunu mübeyyine beyyine taleb olundukda udûl-i Müslimînden zeyl-i hüccet-i mezbûrede muharrerü’l-esâmî olup mahrûse-i mezbûrede Emekyemez mahallesinde Serbölük Halil Çelebi b. Mustafa ve mahrûse-i mezbûreye tâbi‘ kasaba-i Fındıklı’da Avni Efendi mahallesinde sâkin Serbölük İbrahim Çelebi b. Muharrem nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ hâlik-i mezbûr Kürkcü Nikola v. Yorgi v. Yani hâl-i hayâtında helâkinden iki sene mukaddem zikr olunan Kamer Hâtun mahallesinde vâki‘ hudûd-ı mezbûre ile mahdûd ve müştemilât-ı meşrûhayı hâvî olan mülk menzilimi kız karındaşım işbu Eleni’ye dokuz yüz altmış guruşa bey‘ u teslîm edip ol dahi ba‘de’l-iştirâ ve’t-tesellüm ve’l-kabz ve’l-kabûl semeni olan meblağ-ı mezbûr dokuz yüz altmış guruşu yedinden tamâmen ahz u kabz eyledim ba‘de’l-yevm menzil-i mezbûrda bir vechile alâka ve medhalim kalmayıp kız karındaşım mezbûre Eleni’nin mülk-i müşterâsıdır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle bey‘-i evvelin sıhhatine ve bey‘-i sânînin butlânına ba‘de’l-hükm ve’t-tenbîh mâ-vaka‘a bi’l-ibtigā ketb olundu. Fî-evâsıt-ı Zilhicceti’ş-şerîfe sene 1137. Şuhûdü’l-hâl: Başkâtib Halil Efendi, Burusi Mustafa Efendi, Mustafa Beşe b. Receb, İbrahim Çelebi b. Mustafa, Yahya Bey b. Abdullah, Baba Yusuf b. Abdullah.