Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 292 Hüküm no: 312 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanköylü Ahmed b. Mehmed’i Malta’da esir iken esirlikten kurtaran Ravabet v. Papa Marko’ya olan borcunu tecil ettirdiği Deryâ-yı Sefîd’de vâki‘Mikonos cezîresi sâkinlerinden ve tüccâr tâifesinden işbu hâmilü’r-rakīm Ravabet v. Papa Marko nâm zimmî mahfil-i şer‘de İstanköylü Ahmed b. Mehmed mahzarında üzerine da‘vâ ve takrîr-i kelâm edip merkūm İstanköylü Ahmed dâr-ı harbden olan Malta cezîresinden sercüvân esîri olmağla ben dahi mezbûr Ahmed’i kendüye şartı’r-rücû‘ emriyle beş yüz guruşa esîrlikden tahlîs dâr-ı İslâm’a ihrâc eylediğimden sonra mezbûr Ahmed meblağ-ı mezbûr beş yüz guruşun kırk yedi guruşunu bana def‘ u teslîm ben dahi yedinden alıp kabz eylemiş idim hâlâ mezbûr Ahmed’den suâl olunup meblağ-ı bâkī dört yüz elli üç guruşun dahi alıverilmesi murâdımdır dedikde gıbbe’s-suâl mezbûr Ahmed cevâbında fi’l-vâki‘ müdde‘î-i merkūm Ravabet’e ber-vech-i muharrer cihet-i mezbûreden zimmetinde edâsı lâzım dört yüz elli üç guruş deyni bâkī kaldığını ba‘de’l-ikrâr esîr-i mezbûr Ahmed deyni olan meblağ-ı bâkī-i mezbûru ucâleten edâya adem-i kudretinden nâşî istimhâl murâd eyledikde müdde‘î-i merkūm Ravabet dahi esîr-i mezbûrun zimmetinde bâkī kalan dört yüz elli üç guruş hakkını alâ-mühelin ahz u istîfâya ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Zilhicceti’ş-şerîfe sene 1137. Şuhûdü’l-hâl: İstanköylü Ahmed Ağa, Arusi Mustafa Efendi, Ahmed Efendi, İbrahim b. Mustafa, İbrahim b. Muharrem, Mehmed b. Ahmed, Ali Bey b. Abdullah.