Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 293 Hüküm no: 313 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Halil Reis’in menzilinin vârisleri tarafından el-Hâc Osman b. Mehmed’e satıldığı Mahrûse-i Galata muzâfâtından kasaba-i Fındıklı’da el-Hâc Receb mahallesinde sâkine iken bundan akdem vefât eden Âişe bt. Halil Reis nâm hâtunun verâseti sadrî kebîr oğulları el-Hâc Mustafa ve Halil nâm kimesnelere münhasıra olup kable’l-kısme mezbûr el-Hâc Mustafa dahi vefât edip verâseti zevce-i metrûkesi Emetullâh bt. Ahmed nâm hâtuna ve sulbî oğlu Mehmed’e münhasıra ve tashîh-i meselesi bi-hükmi’l-münâsahati’ş-şer‘iyye on altı sehimden olmağla sihâm-ı mezbûreden sekiz sehmi mezbûr Halil’e ve yedi sehmi mezbûr Mehmed’e ve bir sehmi mezbûre Emetullâh hâtuna isâbet eylediği lede’ş-şer‘i’l-enver zâhir ve mukarrer oldukdan sonra sin ve cüssesinin bulûğa tahammülü olup bulûğunu mu‘terif olan mezbûr Mehmed asâleten ve mezbûr Halil kendi tarafından asâleten ve hâlâ zevcesi olan mezbûre Emetullâh bt. Ahmed b. Abdurrahim tarafından bey‘-i âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Mustafa Çelebi b. Mehmed ve Mehmed b. el-Hâc Mustafa nâm kimesneler şehâdetleriyle sâbit olmağla vekâleten meclis-i şer‘de işbu sâhibü’l-kitâb el-Hâc Osman b. Mehmed nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip müteveffât-ı mezbûre Âişe Hâtun’un terekesinden olup mahalle-i mezbûrede vâki‘ bir tarafdan Çörekci Salih mülkü ve bir tarafdan Hacıoğu Mehmed mülkü ve bir tarafdan müşterî-i mezbûr el-Hâc Osman mülkü ve bir tarafdan tarîk-i âm ile mahdûd mülk menzil arsasından tashîh-i mezbûr üzere hisselerimizi asâlet ve vekâletimiz hasebiyle mezbûr el-Hâc Osman tarafından îcâb ve kabûlü hâvî bey‘-i bâtt-ı sahîh-i şer‘î ile yetmiş guruşa bey‘ u teslîm eylediğimizde ol dahi ber-vech-i muharrer iştirâ ve tesellüm ve temellük ve kabûl eylediğinden sonra semeni olan meblağ-ı mezbûr yetmiş guruşu bi-kadri’l-hısas müşterî-i mezbûr el-Hâc Osman yedinden bi’t-tamâm ahz u kabz eyledik ba‘de’l-yevm arsa-i mahdûd-ı mezkûre bi-cemî‘i mâ yeştemilühû ve yahvîhi mezbûr el-Hâc Osman’ın mülk-i müşterâsı olup bizim kat‘an alâka ve medhalimiz kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Zilhicceti’ş-şerîfe sene 1137. Şuhûdü’l-hâl: Abdullah Efendi b. el-Hâc İbrahim imâm, Hacıoğlu Mehmed Çelebi, Kara Hasan kayıkcı, el-Hâc Şems b. Ahmed, Musli Osman Ağa, Mustafa Çelebi b. Mehmed Ağa, es-Seyyid Ahmed Çelebi , Mehmed Çelebi attar, el-Hâc Abdullah b. Ali.