Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 294 Hüküm no: 314 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltana bt. Yamandi’nin Eflak Kostantin v. Yani ile müşterek menzildeki yarı hissesini diğer Yorgi v. Yani’ye sattığı Mahrûse-i Galata’da Sultan Bayezid mahallesi sâkinelerinden Saltana bt. Yamandi nâm Nasrâniye tarafından bey‘-i ati’z-zikri ikrâra vekîl olduğu mezbûre Saltana’nın şahsı ma‘rifet-i şer‘iyye ile ârifân Panayot v. Yanaki ve Dimitri v. Kostantin nâm zimmîler şehâdetleriyle sâbit olan Yorgi v. Dimitri nâm zimmî meclis-i şer‘de işbu hâmilü’r-rakīm diğer Yorgi v. Yani nâm zimmî muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafdan kapu ağası bostanı ve bir tarafdan Şemseddin Efendi Vakfı ve bir tarafdan Yorgi zimmî mülkü ve taraf-ı râbi‘den tarîk-i âm ile mahdûd tabaka-i ulyâda iki bâb oda ve bir matbah ve dehlîz ve vüstâda iki bâb oda ve bir matbah ve dehlîz ve süflâda bir bâb oda ve bir matbah ve bir tahtadan mebnî mahzen ve bi’r-i mâ ve kenîfi müştemil mülk menzilin nısfı müvekkile-i mezbûrenin zevci olup bundan akdem hâlik olan Eflak Kostantin v. Yani nâm zimmînin ve nısf-ı âharı mezbûre Saltana’nın ber-vech-i iştirâki’s-seviy mülkleri olmağla hâlâ müvekkilem mezbûre Saltana menzil-i mahdûd-ı mezbûrda mülk ve hakkı olan nısf hisse-i şâyi‘asını tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr diğer Yorgi’ye iki yüz guruşa bey‘ u temlîk ve teslîm edip ol dahi ber-vech-i muharrer ba‘de’l-iştirâ ve’t-tesellüm ve’l-kabûl semeni olan meblağ-ı mezbûr iki yüz guruşu müte‘allika-i âmme-i da‘vâdan mezbûr diğer Yorgi’nin zimmetini ibrâ ve ıskāt eyledik ba‘de’l-yevm menzil-i mahdûd-ı mezbûrun nısf-ı şâyi‘i mezbûr diğer Yorgi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Zilhicceti’ş-şerîfe sene 1137. Şuhûdü’l-hâl: Mehmed b. Ahmed, Terzibaşı Mehmed Çelebi, Berber Usta Hasan, Serbölük Halil ve İbrahim Çelebi, Aksi v. Dimo, Yani v. Panayot, Rimez v. Kirko, Ali b. Abdullah.