Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 295 Hüküm no: 316 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Abdullah’ın iki aded menzilini kocası İbrahim Ağa b. Mehmed’e sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden mevlânâ İbrahim Efendi me’zûnen bi’l-ketb irsâl olunup ol dahi Galata -sânehallâhu ani’l-âfât ve’l-beliyye-dâhilinde vâki‘ sarây ağalarına mahsûs odaya varıp zeyl-i nemîkada mastûrü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde mahrûse-i Galata hâricinde Tomtom mahallesinde sâkin sâbıkā France elçisinin kethudâsı Fulya v. Fransızko nâm müste’men meclis-i ma‘kūd-ı mezbûrda işbu sâhibetü’l-kitâbi’l-müstetâb umdetü’l-muhadderât zübdetü’l-muvakkarât Hadice Hâtun bt. Abdullah b. Abdülkerîm tarafından bey‘-i âti’l-beyânı tasdîka vekîli olduğu mezbûrenin zevci olup hâlâ sarây-ı mezbûr ağası umdetü’l-emâcid ve’l-ekârim câmi‘u’l-mehâsin ve’l-mekârim Hüseyin Ağa b. Receb Ağa ve Ahmed Ağa b. Mehmed nâm kimesneler şehâdetleriyle şer‘an sâbit ve vekâletine hükm-i şer‘î lâhik olan fahrü’l-akrân İbrahim Ağa b. Mehmed nâm kimesne mahzarında Fransız tercümânlarından Franko v. Korneti hâzır olduğu hâlde ikrâr ve takrîr-i kelâm edip akd-i câî sudûruna değin silk-i mülkümde münselik olup zikr olunan Tomtom mahallesinde kâin bir tarafdan Mıgırdıç Ermeni mülkü ve tarafeynden ba‘zen Save zimmî ve ba‘zen İngiliz tercümânı Lukaki mülkleri ve ba‘zen Vetyarye nâm Nasrâniye mülkü ve bir tarafdan tarîk-i âm ile mahdûd ulyâda üç bâb oda ve bir köşk ve iki sofa ve dehlîz ve vüstâda bir bâb oda ve tehlîz ve süflâda bir mahzen ve bir matbah ve bir fırın ve bir sahrınc ve bir köşk ve bi’r-i mâ ve kenîf ve tûlen ve arzan bi-hesâb-ı terbî‘i üç bin elli iki buçuk zirâ‘ hadîkayı ve sokak kapısını müştemil mülk menzilim ile yine mahalle-i mezbûrede vâki‘ bir tarafdan bâlâda zikr olunan mülk menzil ve bir tarafdan Dimitraki mülkü ve bir tarafdan merhûm Makrizâde el-Hâc Hüseyin Kapudan Vakfı ve bir tarafdan sarây-ı mezbûr direkleriyle mahdûd fevkānî üç bâb oda ve dehlîz ve tahtânî iki bâb oda ve zîr-i zemîn ve bir matbah ve bir bahçıvan odası ve bir bi’r-i mâ ve kenîf ve tûlen ve arzen bi-hesâb-ı mezbûr üç yüz yetmiş beş zirâ‘ eşcâr-ı müsmire ve gayr-i müsmireli bahçeyi muhtevî mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin vekîl-i mûmâ-ileyh İbrahim Ağa’ya beş bin esedî guruşa bey‘ u temlîk ve teslîm edip ol dahi müvekkil-i mezbûr Hadice Hâtun için bi’l-vekâle iştirâ ve temellük ve tesellüm [46a] ve kabûl eyledikden sonra semeni olan meblağ-ı merkūm beş bin guruşu müvekkil-i mûmâ-ileyh İbrahim Ağa yedinden bi’t-tamâm ve’l-kemâl ahz u kabz eyleyip menzil-i mezbûrun semenine ve gabn-ı fâhişi ve tağrîrine müte‘allika âmme-i da‘vâdan vekîl-i mezbûr İbrahim Ağa ile müvekkile-i mezbûre Hadice Hâtun’un zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim fîmâ ba‘d menzileyn-i mahdûdeyn-i mesfûreyn bi-cümletin mâ yüştemilühâ ve yahvîhi müvekkile-i merkūme Hadice Hâtun’un mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde vâki‘ hâli mevlânâ-yı mezbûr mahallinde ketb ü tahrîr ve ma‘an meb‘ûs Çukadâr Hüseyin ve Mustafa ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’l-ibtigā ketb olundu. Fî 26 min-Zilhicce sene [1]137 Şuhûdü’l-hâl: el-Hâc Ahmed b. İsa kethudâ-yı bahçıvân-ı sâbık, Mehmed Ağa b. Hasan Kethüda teberdâr-ı sarây-ı mezbûr, İsmail Çelebi b. Ali, İbrahim Ağa b. Ali Halife, Mehmed Çelebi b. Mustafa serçavuşân-ı sarây-ı mezbûr, Abdullah Çelebi b. Mustafa, Ahmed b. Osman, Teberdâr Hasan b. Yusuf.