Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 296 Hüküm no: 317 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elenice bt. Vasil’in Hadice bt. Abdullah’a kalan borcunu ödemesi için doksan bir gün süre verildiği Mahrûse-i Galata hâricinde Dörtyolağzı kurbünde sâkine Elenice bt. Vasil v. Yani nâm Nasrâniye tarafından ikrâr-ı âti’l-beyâna vekîli olduğu merkūmenin şahsını ma‘rifet-i şer‘iyye ile ârifân Mehmed Beşe b. Ahmed ve İbrahim Beşe b. Abdullah nâm kimesneler şehâdetleriyle mahzar-ı hasm-ı münkirde şer‘an sâbit ve vekâletine hükm-i şer‘î lâhik olan Hadice bt. Abdullah nâm hâtun mahfil-i şer‘de işbu râfi‘u’l-kitâb Molla Mustafa b. Ahmed Efendi mahzarında bi’l-vekâle ikrâr ve takrîr-i kelâm edip müvekkile-i merkūme Elenice’nin mezbûr Molla Mustafa’ya beher vakiyyesi doksan beşer akçeye olmak üzere yedinden iştirâ ve kabz eylediği yüz otuz dört buçuk vakiyye bayır dizisi duhân semeninden cem‘an zimmetinde on iki bin yedi yüz yetmiş yedi akçe edâsı lâzım deyni olup lâkin meblağ-ı merkūmu hâlâ edâya adem-i kudretinden nâşî müvekkilem merkūme Elenice istimhâl eyledikde mezbûr Molla Mustafa dahi meblağ-ı mezbûr on iki bin yedi yüz yetmiş yedi akçeyi târih-i kitâbdan doksan bir gün tamâmına değin imhâl ve te’cîl eyledi dedikde gıbbe’t-tasdîki’ş-şer‘î merkūme Hadice Hâtun yine meclis-i mezkûrda mezbûr Molla Mustafa mahzarında ikrâr ve takrîr-i kelâm edip eğer merkūm Elenice ânifen zikr olunduğu üzere cihet-i mezbûreden merkūm Molla Mustafa’ya zimmetinde deyni olan meblağ-ı mezbûr on iki bin yedi yüz yetmiş yedi akçeyi ecel-i mersûm hulûlüne değin dâyin-i merkūm Molla Mustafa’ya edâ ve teslîm edemezse ben tarafeynden emr ü kabûlü hâviye kefâlet-i sahîha ile kefîl bi’l-mâl oldum dedikde mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Zilhicceti’ş-şerîfe sene 1137. Şuhûdü’l-hâl: İbrahim b. Abdullah el-mübâşir, Mehmed Beşe b. Ahmed, Süleyman Çavuş, Serbölük İbrahim Çelebi, Molla Mehmed b. Yusuf du‘âcı.