Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 297 Hüküm no: 318 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hasan’ın es-Seyyid Halil Çelebi b. es-Seyyid Mehmed ile zimmetlerini ibra ettikleri Mahrûse-i Galata tevâbi‘inden kasaba-i Tophane’de Kuloğlu mahallesinde sâkine olup zâtı ta‘rîf-i şer‘î ile mu‘arrefe olan Fâtıma bt. Hasan nâm hâtun meclis-i şer‘-i şerîf-i nebevîde zevc-i muhâlı‘ı işbu râfi‘u’l-vesîka es-Seyyid Halil Çelebi b. es-Seyyid Mehmed nâm kimesne mahzarında ikrâr ve takrîr-i kelâm edip zevcim mezbûr es-Seyyid Halil Çelebi ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum ecilden zimmetinde mütekarrır ve ma‘kūdün-aleyh olan üç bin akçe mehr-i mü’eccelimden geçip ve mezbûrun firâşından hâsıl hâlâ batnımda mevcûd hamlim olup iddetim vaz‘-ı haml ile munkazıye olup vaz‘-ı haml edinceye değin nafaka-i iddet ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-selh-i Zilhicceti’ş-şerîfe sene 1137. Şuhûdü’l-hâl: Molla Mehmed imâm, İbrahim Çelebi b. Muharrem, Haseki Mustafa Beşe, Kasımpaşalı Mehmed, Nalçacı Mehmed Beşe, Deli İbrahim muhzır.