Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 298 Hüküm no: 319 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâce Fatıma Hatun bt. Ramazan’dan kızı Ümmügülsüm Hatun bt. el-Hâc Ömer’e intikal eden menzilin el-Hâc Ahmed b. Abdülkerim’in kızı Habibe’ye satıldığı Mahrûse-i Galata a‘mâlinden kasaba-i Fındıklı’da Perizat Hâtun mahallesinde sâkine iken bundan akdem müteveffiye olan Hâce Fâtıma Hâtun bt. Ramazan’ın verâseti zevc-i metrûku el-Hâc Ömer b. Osman ve kebîre kızı Ümmügülsüm Hâtun’a münhasıra olduğu ve mezbûr el-Hâc Ömer zevcesi müteveffât-ı mezbûrenin terekesinden kendüye isâbet eden rub‘ hisse-i irsiyyesini nükūddan olmak üzere tamâmen ahz u istîfâ etmeğle terekeden olan zikri câî mülk menzilin mecmû‘u müstakillen mezbûre Ümmügülsüm’ün mülkü olduğu lede’ş-şer‘i’l-enver zâhir ve mukarrer oldukdan sonra zâtı Arusi Mustafa Efendi b. Hasan ve Halil Çelebi b. Mehmed ta‘rîfleriyle mu‘arrefe olan mezbûre Ümmügülsüm Hâtun bt. el-Hâc Ömer meclis-i şer‘de Habibe nâm sagīrenin babası ve velîsi işbu bâ‘isü’l-vesîka el-Hâc Ahmed b. Abdülkerîm mahzarında ikrâr ve takrîr-i kelâm edip akd-i âtî sudûruna değin ber-vech-i muharrer anam müteveffât-ı mezbûre Fâtıma Hâtun’dan bana mevrûs mülküm olup mahalle-i mezbûrede vâki‘ bir tarafdan Halil Yazıcı mülkü ve bir tarafdan Fırıncı el-Hâc Hüseyin veresesi mülkü ve bir tarafdan tarîk-i hâs ve bir tarafdan tarîk-i âm ile mahdûd fevkānî altı bâb oda ve bir sofa ve dehlîz ve mağsel ve kenîf ve tahtânî iki bâb oda ve üç kenîf ve iki bi’r-i mâ ve mahtab ve bir mikdâr havluyu müştemil mülk menzilimi bundan akdem Münâdî Ahmed Çelebi yediyle bey‘a arz ve sûk-ı sultânîde nidâ ve müzâyede ettirdiğimizde mezbûr el-Hâc Ahmed üzerinde sekiz yüz on guruşda karâr edip ragabât-ı nâs bi’l-külliye münkatı‘a olup ziyâde ile tâlib-i âhar zuhûr etmemeğin ben dahi menzil-i mahdûd-ı mezkûru bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr el-Hâc Ahmed’e tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz yüz on guruşa bey‘ u teslîm eylediğimde ol dahi kızı sagīre-i mezbûre Habibe için bi’l-velâye iştirâ ve temellük ve tesellüm eyledikden sonra semeni olan meblağ-ı mezbûru mezbûr el-Hâc Ahmed yedinden tamâmen alıp kabz eylediğimden sonra menzil-i mezbûrun gabn ve tağrîrine müte‘allika âmme-i da‘vâdan mezbûr el-Hâc Ahmed ile [46b] kızı sagīre-i mezbûre Habibe’nin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezkûr bi-cümletin mâ yeştemilühû ve yahvîhi sagīre-i mezbûrenin mülk-i müşterâsı olmuşdur keyfe mâ yeşâ ve yahtâr mutasarrıfa olsun dedikde gıbbe’t-tasdîki’ş-şer‘î mezbûre Ümmügüsüm’ün zevci el-Hâc Receb b. Mustafa ve kebîr oğlu Halil Çelebi b. Mehmed ve İbrahim Ağa b. Mehmed nâm kimesnelerden her biri menzil-i merkūma bi’l-emr ve’l-kabûl kefîl ve dāmin olmağın mâ-hüve’l-vâkı‘ li-ecli’t-tevsîk bi’l-ibtigā ketb olundu. Fi’l-yevmi’s-sâmin ve’l-ışrîn min-Zilhicceti’ş-şerîfe sene 1137. Şuhûdü’l-hâl: İmâm İbrahim Efendi, Keresteci el-Hâc Abdullah, Münadi Ahmed Çelebi, Uncu el-Hâc Mehmed, Fırıncı Ali Çelebi, Yazıcı Bakkal Mustafa, Manav Yusuf Beşe, Ahmed Çelebi b. Abdullah, Halil Çelebi b. Mustafa, İbrahim Çelebi b. Muharrem.