Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 299 Hüküm no: 321 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın kocası Abdülkadir Beşe b. Ahmed’den muhalaa ile boşandığı Mahrûse-i Galata’[da] Bereketzâde mahallesinde sâkine Hadice bt. Abdullah b. Abdülmennân nâm hâtun tarafından ber-vech-i âtî hul‘ ve ibrâyı ikrâra vekîli olduğu mezbûrenin zâtını ma‘rifet-i şer‘iyye ile ârifân Nasuh Efendi b. Mehmed ve Müezzin Abdurrahman Çelebi b. Ali nâm kimesneler şehâdetleriyle sâbit olan Hüseyin Efendi b. Hasan nâm kimesne meclis-i şer‘de müvekkile-i mezbûrenin zevc-i muhâlı‘ı işbu râfi‘u’l-vesîka Abdülkādir Beşe b. Ahmed nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Hadice Hâtun’un zevci mezbûr Abdülkādir Beşe ile beynlerinde hüsn-i zindegânîleri olmayıp hul‘a tâlibe ve râgıbe olduğu cihetle zimmetinde mütekarrır ve ma‘kūdün-aleyh olan üç bin beş yüz akçe mehr-i mü’eccelinden fâriğa olup nafaka-i iddet ve me’ûnet-i süknâsı dahi kendi üzerine olmak üzere zevci mezbûr Abdülkādir Beşe ile muhâla‘a-i sahîha-i şer‘iyye ile hul‘ olduğumda ol dahi ber-vech[-i muharrer] hul‘-i mezbûru kabûl eyledikden sonra hukūk-ı zevciyyete vesâire müte‘allika âmme-i da‘vâdan her biri âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Zilhicceti’ş-şerîfe sene 1137. Şuhûdü’l-hâl: Ahmed Çelebi b. Mehmed attâr, Ebûbekir Beşe b. Receb, Hasan Beşe b. Abdullah, Abdüllatif Çelebi, el-Hâc Mahmud, el-Hâc Mehmed Efendi b. Hasan.