Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 300 Hüküm no: 322 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kötü halinden dolayı bulunduğu mahalleden çıkan ve daha önce zindana girmesi sebebiyle bir evladı vefat eden Hadice bt. Mustafa’nın mahalle ile dava ve nizası olmadığı Mahrûse-i Galata muzâfâtından kasaba-i Tophane’de Cihangir mahallesinde sâkine Hadice bt. Mustafa nâm hâtun zâtı ba‘de’t-ta‘rîfi’ş-şer‘î meclis-i şer‘de mahalle-i mezbûre ahâlîsinden işbu ashâbi’l-kitâb İmâm İbrahim Efendi b. Mehmed ve Müezzin Ahmed Efendi b. Hüseyin ve Molla Ahmed b. ( ) ve el-Hâc Mehmed ( ) ve el-Hâc Ahmed ve el-Hâc Mehmed b. Ahmed ve es-Seyyid Ahmed b. Mehmed vesâirleri mahzarında ikrâr ve takrîr-i kelâm edip mahalle-i mezbûre ahâlîsi yedlerinde olan i‘lâmları nâtık olduğu üzere bundan akdem benim sû-i hâlimi ihbâr ve mahalle-i mezbûreden hurûcumu iltimâs eylediklerinde ta‘neten mahalle-i mezbûreden hurûc eylemediğim ecilden izn-i şer‘iyle beni vaz‘-ı zindân eylediklerinde zindânda bir evlâdım vefât eylemiş idi hâlâ ben rızâm ile bir dahi mahalle-i mezbûreye gelmemek üzere hurûca ta‘ahhüd ve evlâdımın fevtine müte‘allik ahâlî-i mahalle-i mezbûre ile kat‘an da‘vâ ve nizâ‘ım olmayıp zimmetlerini ibrâ ve ıskāt eyledim dedikde gıbbe’t-tasdîki’ş-şer‘î mezbûre Saliha Hâtun’un ber-vech-i muharrer mahalle-i mezbûre hurûcuna karındaşı el-Hâc Mehmed b. Mustafa nâm kimesne kefîl olup ve mezbûr el-Hâc Mehmed’in dahi nefsine ve hîn-i mutâlebede meclis-i şer‘a ihzârına Doğramacı Mehmed kefîl olmağın mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Cumâdelûlâ sene 1137. Şuhûdü’l-hâl: Mustafa Çelebi b. el-Hâc İbrahim, Mustafa Ağa b. el-Hâc Mehmed, Ali Çelebi b. İsa, Hasan Çelebi b. İbrahim, Hüseyin b. Mustafa ve gayrühum.