Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 300 Hüküm no: 323 Orijinal metin no: [46b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Mehmed’in vârisleri el-Hâc Ahmed’le kira davasında sulh oldukları Mahrûse-i Galata hâricinde Müeyyedzâde mahallesinde sâkin iken bundan akdem vefât eden Mustafa Çelebi b. Mehmed’in verâseti zevce-i metrûkesi Rabia bt. İbrahim b. Abdullah nâm hâtuna ve sulbî kebîr oğulları Ali ve Ahmed’e münhasıra olduğu lede’ş-şer‘i’l-enver zâhir ve mukarrer oldukdan sonra mezbûr Ali kendi tarafından asâleten ve anası mezbûre Rabia Hâtun tarafında ibrâ-yı câi’z-zikri ikrâra vekîli olduğu zât-ı mezbûreyi ma‘rifet-i şer‘iyye ile ârifân Hüseyin Efendi b. Hasan ve Ali Çelebi b. el-Hâc Derviş nâm kimesneler şehâdetleriyle sâbit olmağla meclis-i şer‘de işbu râfi‘u’l-kitâb Ahmed b. Osman mahzarında bi’l-asâle ve bi’l-vekâle ikrâr ve takrîr-i kelâm edip mezbûr el-Hâc Ahmed bundan akdem babam müteveffâ-yı mezbûrdan verese-i mezkûresine müntakıl mahalle-i mezbûre ile Şahkulu mahallesinde vâki‘ menzillerimizde beş sene sâkin olmağla menzileyn-i mezbûreyn îcârlarından ve tarafımızdan vekâleten ahz u kabz eylediği odalar îcâratından zimmetinde dört yüz elli guruş hakkımız vardır deyü mezbûr el-Hâc Ahmed’den da‘vâ sadedinde olduğumuzda beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip da‘vâ-yı mezkûremizden mezbûr el-Hâc Ahmed ile bizi yirmi guruş üzerine inşâ-i akd-i sulh eylediklerinde biz dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr yirmi guruşu bi-kadri’l-hısas mezbûr el-Hâc Ahmed yedinden her birimiz tamâmen ahz u kabz eylediğimizden sonra husûs-ı mezkûra ve bedel-i sulh-i mezbûra ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min-Zilhicceti’ş-şerîfe sene 1137. Şuhûdü’l-hâl: İbrahim b. Muharrem, Ahmed Reis b. Mehmed, Osman Çelebi b. Mehmed, İbrahim b. Veli, el-Hâc Ahmed b. Veli, Süleyman Çelebi b. Mehmed, es-Seyyid Ali Ağa b. Hasan, el-Hâc Mehmed b. Mustafa, el-Hâc Mehmed b. Mehmed, el-Hâc Ahmed Çavuş, Hüseyin Efendi b. Hasan, el-Hâc Mehmed Efendi el-imâm.