Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 301 Hüküm no: 324 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Isterton v. Harşovorlu’nun menzilinin dehlizini vefatından önce Togofilo’ya sattığından Togofano’nun davadan men edildiği Mahrûse-i Galata a‘mâlinden Marmara nâhiyesine tâbi‘ Asmalı nâm karyede sâkin iken üç sene mukaddem hâlik olan Esterton v. Harşovorlu v. Deriga nâm zimmînin verâseti zevce-i metrûkesi Togofano bt. Zafiri nâm Nasrâniye ile ve sagīr oğulları Togoroş ve Markorobloya ile kebîre kızları Prakasya ve Litaroya ve sagīre kızları Varvanya ve Maryore’ye münhasıra olup kable’l-kısme merkūme Maryore dahi hâlike olup verâseti anası mersûme Togofano ile li-ebeveyn karındaşları merkūmûn Togoroş ve Markorobloya ve Prakasya ve Lişar ve Vardanya’ya münhasıra olup kable’l-kısme merkūme Prakasya dahi hâlike olup verâseti zevc-i metrûku Togofilo <> v. Moskona ile anası merkūme Togofano’ya ve sagīr oğlu Moskona’ya münhasıra olduğu lede’ş-şer‘i’l-enver zâhir oldukdan sonra merkūme Togofano asâleten ve sagīrûn-ı merkūmûn Togoroş ve Markoroboloye ve Vardanya’nın tesviye-i umûrlarını rü’yete vasîleri olmağla vesayeten meclis-i şer‘de işbu hâmilü’r-rakīm merkūme Togofilo muvâcehesinde bi’l-asâle ve bi’l-vekâle üzerine da‘vâ ve takrîr-i kelâm edip hâlik-i merkūm Isterton’un ile’l-helâk mülkü olup ba‘de helâkihî verese-i mezkûresine mevrûs olup karye-i mezbûrede vâki‘ bir tarafdan Kosta menzili ve bir tarafdan Sakostina menzili ve bir tarafdan Kostaki menzili ve bir tarafdan tarîk-i âm ile mahdûd fevkānî bir bâb oda ve dehlîz ve tahtında eşcâr-ı müsmire ve gayr-i müsmireyi müştemil mülk menzilin ancak dehlîzini merkūm Togofilo fuzûlî zabt etmek murâd eder suâl olunup men‘ u def‘ olunmak matlûbumdur dedikde gıbbe’s-suâl merkūm Togofilo cevâbında fi’l-vâki‘ hâlik-i merkūm Esterton’u hâl-i hayâtında menzil-i mezbûrun ancak dehlîzini ba‘de’l-ifrâz otuz beş guruş semen-i makbûza bana bey‘ u temlîk ve teslîm eyledikde ben dahi iştirâ ve temellük ve tesellüm ve kabûl <> eylediğimden sonra merkūm Isterton hâlik olmağın merkūm Togofano zikr olunan dehlîzi işbu yedimde olan hüccet-i şer‘iyye mantûkunca 1137 şehr-i Rebiulevvel’inin <>on beşinci günü nâhiye-i mezbûrede nâibü’ş-şer‘i’ş-şerîf olan Mehmed Emin Efendi b. Abdurrahman b. Abdüssamed huzûrunda benden da‘vâ ben dahi husûs-ı mezbûru ber-minvâl-i muharrer Agosti v. Mavradi ve Isterato v. Dülger nâm zimmîler şehâdeteriyle muvâcehesinde ba‘de’l-isbât merkūme Togofano mu‘ârazadan men‘ olunmuş idi mazmûnu min külli’l-vücûh takrîr-i meşrûhuna muvâfık ve târih-i mezbûr ile müverraha ve nâib-i mezbûrun imzâsıyla mümzât ve hatemiyle mahtûme bir kıt‘a hüccet-i şer‘iyye ibrâz edicek ba‘de’l-feth ve’l-kırâet ve’l-istintâk ve’l-inkâr merkūm Togofilo’dan mazmûnu sıhhat-i şer‘iyyeyi mübeyyine beyyine taleb olundukda udûl-i ahrâr-ı ricâl-i Müslimînden olup nâhiye-i mezbûreye tâbi‘ Kılazova nâm karye sâkinlerinden Derviş İbrahim b. Zülfikar ve İsmail b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘iyye-i merkūme Togofano karye-i mezbûrede vâki‘ bir tarafdan Kosta menzili ve bir tarafdan Sakostina menzili ve bir tarafdan Kostaki menzili ve bir tarafdan tarîk-i âm ile mahdûd fevkānî bir bâb oda ve dehlîz ve tahtında eşcâr-ı müsmire ve gayr-i müsmireli mülk menzilin ancak dehlîzini bi-gayrı hakkın fuzûlî zabt edersin deyü Togofilo’dan 1137 senesi Rebiulevvel’in on beşinci günü nâhiye-i mezbûrede nâibü’ş-şer‘i’ş-şerîf olan Mehmed Emin Efendi b. Abdurrahman b. Abdüssamed huzûrunda ba‘de’d-da‘vâ merkūm Togofilo zikr olunan dehlîzi hâlik-i mersûm Esterton’dan hayâtında <<35 gün mukaddem>>otuz beş guruşa iştirâ eylediğini nâib-i mezbûr huzûrunda Agosti v. Mardiro v. Dimo ve Isterato v. diğer Yanaki nâm zimmîler şehâdetleriyle müdde‘iyye-i merkūme Togofano muvâcehesinde vech-i şer‘î üzere isbât ve merkūme Togofano’yu bizim huzûrumuzda bî-vech mu‘ârazadan men‘ olundu biz mazmûn-ı hüccet-i şer‘iyyeye bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh mâ hüve’l-vâki bi’l-ibtigā ketb olundu. Fi’l-yevmi’t-tâsi‘ aşer min-Zilhicceti’ş-şerîfe sene 1137. Şuhûdü’l-hâl: İbrahim Çelebi b. Mehmed, Ahmed Efendi b. eş-Şeyh Süleyman, İbrahim b. Mustafa, Mustafa b. Ahmed, Ali Bey b. Abdullah, Mehmed Çelebi b. Ahmed.