Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 303 Hüküm no: 325 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. La‘ligün bt. Abdullah’ın gözetimi ve bakımında olan Havva bt. Tuğcu Hüseyin için ebeveyni Hüseyin ve Şehri Hatun’un nafaka ödemesi Mahrûse-i Galata’ya tâbi‘ kasaba-i Tophane’de el-Hâc Memi mahallesinde sâkine işbu bâ‘isetü’l-vesîka La‘ligün bt. Abdullah b. Abdurrahman nâm hâtun tarafından husûs-ı âti’z-zikre sâbitü’l-vekâle vekîli olan damadı Ali Çelebi b. Ebûbekir nâm kimesne meclis-i şer‘de bi’l-vekâle takrîr-i kelâm edip işbu hâzıra bi’l-meclis Havva bt. Tuğcu Hüseyin nâm sagīreyi terbiye ve tebennî için mukaddemâ ebeveyni mezbûr Hüseyin ve Şehri Hâtun müvekkilem mezbûre La‘ligün’e teslîm etmiş idi lâkin sagīre-i mezbûrenin el-yevm nafaka ve kisve bahâya zarûret ve ihtiyâcı olmağın alâ men lehû hakku’t-taleb üzerine kıbel-i şer‘den kadr-i kifâye nafaka ve kisve bahâ farz ve takdîr olunması müvekkilem mezbûre La‘ligün Hâtun’un murâdıdır dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûrenin nafaka ve kisve ve levâzım-ı zarûriyyesiʼçün külli yevm ikişer para farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisve ve levâzım-ı zarûriyyesine harc ve sarfa ve lede’l-iktizâ istidâneye ve ınde’z-zafer men lehü hakkı’t-taleb üzerine rücû‘a mezbûre La‘ligün Hâtun’a izin verilmeğin mâ-vaka‘a bi’l-ibtigā ketb olundu. Fi’l-yevmi’s-samin ve’l-ışrîn min-Zilhicceti’ş-şerîfe sene 1137. Şuhûdü’l-hâl: Ali b. Abdullah, Mehmed b. Ahmed, Halil Çelebi b. Mustafa, İbrahim Çelebi b. Muharrem.