Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 303 Hüküm no: 326 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mustafa’nın Mustafa b. Mehmed’den alacak davasında sulh oldukları ve Mustafa’nın borcunu taksitlendirdikleri Mahrûse-i Galata muzâfâtından kasaba-i Tophane’de Tomtom mahallesinde sâkine Ümmügülsüm bt. Mustafa nâm hâtun zâtı ba‘de’t-ta‘rîfi’ş-şer‘î meclis-i şer‘de zevc-i sâbıkı işbu râfi‘u’l-kitâb Mustafa b. Mehmed nâm kimesne mahzarında bi-tav‘ihâ ikrâr ve takrîr-i kelâm edip mezbûr Mustafa zimmetinde yedimde olan i‘lâm nâtık olduğu üzere cihet-i karz-ı şer‘îden ve kayık semeninden cem‘an elli guruş hakkım olmağla meblağ-ı mezbûru mezbûr Mustafa’dan taleb ve da‘vâ sadedinde olmuş idim el-hâletü hâzihî beynimize muslihûn tavassut edip beni da‘vâ-yı mezkûremden mezbûr Mustafa ile yirmi guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh-i mezbûrun on guruşunu ber vech-i peşîn yedinden ahz u kabz eyleyip ve on guruşunu dahi ayda bana ikişer guruş vermek üzere 1138 senesi Muharremü’l-harâmı gurresinden beş ay tamâmına değin te’cîl ve taksît ve mâ‘adâsı olan otuz guruşa vesâire müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mezbûr Mustafa’nın hâlâ zevce-i menkûhası olan İsmihan bt. Abdullah nâm hâtun meblağ-ı mukassat-i mezbûr on guruşa tarafeynden emr ve kabûlü hâviye kefîl olup ve mezbûre İsmihan Hâtun’un dahi nefsine ve hîn-i mutâlebede meclis-i şer‘a ihzârına dahi Âişe bt. Mehmed nâm hâtun kefîl olmağın mâ-hüve’l-vâkı‘ bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Hüseyin b. Ali, İbrahim b. Mustafa, Mustafa b. Ahmed, Mehmed Bey b. Halil.