Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 304 Hüküm no: 328 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Mustafa isimli kız çocuğu için Osman Çelebi b. el-Hâc Mustafa’ya nafaka ödenmesine karar verildiği Mahrûse-i Galata hâricinde Şahkulu mahallesinde sâkin işbu râfi‘u’l-kitâb Osman Çelebi b. el-Hâc Mustafa nâm kimesne meclis-i şer‘de takrîr-i kelâm ve ta‘bîr ani’l-merâm edip vilâyet-i Anadolu’da Ayandon kazâsına tâbi‘ Mogan nâm karyeden olmak üzere işbu hâzıratü bi’l-meclis Safiye bt. Mustafa nâm sagīreyi akrabasından bir hâtun li-ecli’t-tebennî bundan akdem bana teslîm edip ben dahi ber-vech-i muharrer ahz eylemişidim lâkin sagīre-i mezbûrenin nafakaya ihtiyâcı olmağla men lehû hakku’t-taleb üzerine cânib-i şer‘den mikdâr-ı kifâye meblağ farz ve takdîr olunması matlûbumdur dedikde hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- efendi hazretleri dahi sagīre-i mezbûrenin nafaka ve kisve vesâir levâzım-ı zarûriyyesiʼçün men lehû hakku’t-taleb üzerine târih-i kitâbdan yevmî ikişer para farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisve ve levâzım-ı sâiresine harc ve sarfa ve lede’l-iktizâ istidâneye ve ınde’z-zafer men lehû hakku’t-taleb üzerine rücû‘a mezbûr Osman Çeleb[ye] izin vermeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Muharremi’l-harâm sene 1138. Şuhûdü’l-hâl: Veli Beşe b. Halil, Mehmed b. Mustafa, İbrahim b. Mustafa, Kürkcü Osman Beşe, el-Hâc Süleyman b. Halil, Mustafa b. Ahmed.