Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 305 Hüküm no: 329 Orijinal metin no: [47b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Can Gravan v. Andarye’nin sefinesini Kandiye Limanı’na gidip gelmek üzere İbrahim Beşe, Mustafa Beşe, es-Seyyid Mehmed ve el-Hâc Ahmed’e kiraya verdiği Fransız kapudanlarından Can Gravan v. Andarye nâm müste’men meclis-i şer‘de işbu ashâbi’l-kitâb İbrahim Beşe b. Halil ve Mustafa Beşe b. Mehmed ve es-Seyyid Mehmed Çelebi b. Mehmed ve el-Hâc Ahmed b. Abdullah nâm kimesneler mahzarlarında Tercümân Franko v. Can Batista hâzır olduğu hâlde ikrâr ve takrîr-i kelâm edip mahrûse-i Galata hısnı ebvâbından Karaköykapısı İskelesi’nde merbût örf-i mellâhînde Şeytine ta‘bîr olunur sefînemi âlât ve su ve kumanya vaz‘ olunan mahallerden mâ‘adâsını İstanbul’dan Deryâ-yı Sefîd’de vâki‘ Girid cezîresinde Kandiye limanına varınca beş yüz yetmiş beş guruşa mezbûrûn İbrahim Beşe ve Mustafa Beşe ve es-Seyyid Mehmed ve el-Hâc Ahmed’e îcâr ve teslîm eylediğimde onlar dahi ber-vech-i muharrer istîcâr ve kabûl eylediler dedikde gıbbe’t-tasdîki’ş-şer‘î yine kapudân-ı merkūm Gravan meclis-i mezbûrda eşhâs-ı mezbûre mahzarlarında i‘âde-i kelâm edip işbu târih-i kitâb-ı şehrînin yirminci günü İstanbul’dan hareket olunup esnâ-i tarîkde Marmara’ya ve cezîre-i Sakız’a uğrayıp her birinde ikişer gün meks oluna ve mecmû‘ gümrük harcı mezbûrûnun olup konsolos ve liman harcı benim ola ve icâret-i mezbûrenin iki yüz guruşu bu tarafda teslîm olup inşâallâh selâmet ile Kandiye Limanı’na varıldıkda ücret-i mezbûre beş yüz yetmiş beş guruşu bana tamâmen edâ olunmadıkca bir nesne ihrâc olunmaya ve eşhâs-ı mezbûre talebleriyle bu tarafda meks iktizâ ederse eyyâm-ı meksde bana harc-ı kumanya beş guruş vermek üzere beynimizde kavl ü ittifâk ve ahd-i mîsâk eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Muharremi’l-harâm sene 1138. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Mustafa b. Receb, İbrahim b. Mustafa, Mehmed b. Ahmed, Mustafa b. Ahmed.