Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 306 Hüküm no: 330 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin adındaki çocuğunun vasisi Helvacı Musa Çelebi’nin, Hüseyin’in gelirlerinden artan meblağı asıl malına ilhak etmeyi taahhüd ettiği Mahrûse-i Galata’ya tâbi‘ kasaba-i Tophane’de Pürtelaş Hasan mahallesinde sâkinler iken bundan akdem vefât eden el-Hâc Ahmed b. Abdullah ve Hanife bt. Ahmed nâm zevcânın sagīr oğulları Hüseyin’in tesviye-i emrini rü’yete kıbel-i şer‘den mansûb vasîsi olan Helvacı Musa Çelebi b. Mehmed nâm kimesne meclis-i şer‘de sagīr-i mezbûrun karındaşı ve kıbel-i şer‘den hasbî nâzır nasb olunan Mustafa Çelebi b. el-Hâc Ahmed hâzır olduğu hâlde bi’l-vesaye ikrâr ve takrîr-i kelâm edip sagīr-i mezbûr Hüseyin’e mûrisleri müteveffiyân-ı mezbûrânın terekelerinden ber-mûceb-i defter-i kassâm isâbet ve intikāl eden altmış dokuz buçuk guruş nükūd mâlının nemâsıyla yine mahalle-i mezbûrede vâki‘ mülk menzilinin icâresinden târih-i kitâba gelince sagīr-i mezbûrun levâzım-ı mühimmesini rü’yet etmiş idim hâlâ yine ben bi’l-vesaye kabzımda olan meblağ-ı mezbûr altmış dokuz buçuk guruşu târih-i vesîkadan onu on bir hesâbı üzere deruhde ve kabûl eylediğimden sonra menzil-i mezbûru dahi âhara îcâr edip mâl-ı nükūdu nemâsıyla menzil-i mezbûr icâresinden hâsıl olan meblağdan sagīr-i mezbûrun iktizâ eden levâzım-ı mühimmesine rüşdü vaktine değin beher sene rü’yet edip ve fazlasını asl-ı mâlına zamm ve ilhâk etmek üzere ta‘ahhüd eyledim dedikde mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Zilhicceti’ş-şerîfe sene 1137. Şuhûdü’l-hâl: Serbölük Halil Çelebi, Serbölük İbrahim Çelebi, Arusi Mustafa Efendi, Sipahi Ahmed Efendi, Baba Yusuf, Mustafa Efendi b. Mehmed.