Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 306 Hüküm no: 331 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mikail v. Şöhret’in boş olan arsasını İbrahim Beşe b. Ali’ye sattığı Mahrûse-i Galata’ya tâbi‘ Ortaköy sâkinlerinden Mikail v. Şöhret nâm Ermeni meclis-i şer‘de işbu râfi‘u’l-vesîka İbrahim Beşe b. Ali nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahrûse-i mezbûre hâricinde Hüseyin Ağa mahallesinde vâki‘ iki tarafdan benim âhar mülküm ve bir tarafdan Onan nâm zimmî mülkü ve taraf-ı râbi‘den tarîk-i âm ile mahdûd bir dip ceviz ağacını müştemil tûlen elli üç ve arzen on bi-hesâb-ı terbî‘i beş yüz otuz zirâ‘ mülk arsa-i hâliyemi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İbrahim Beşe’ye yüz guruşa bey‘ u teslîm edip ol dahi ber-vech-i muharrer ba‘de’l-iştirâ ve’t-tesellüm ve’l-kabûl semeni olan meblağ-ı mezbûr yüz guruşu müşterî-i mezbûr yedinden tamâmen ahz u kabz eyledim ba‘de’l-yevm arsa-i mahdûde-i merkūme mezbûr İbrahim Beşe’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Muharremi’l-harâm sene 1138. Şuhûdü’l-hâl: el-Hâc Ahmed b. İsa, Keresteci Ali b. Ahmed, es-Seyyid Hasan Çelebi b. Musli, Serbölük Halil Çelebi ve İbrahim Çelebi b. Muharrem, Mustafa Beşe b. Receb.