Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 307 Hüküm no: 333 Orijinal metin no: [48a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. el-Hâc Ahmed’in mülk menziliyle değirmen ve müştemilatlarını Margos ve Anton kardeşlere sattığı El-emru hasbemâ yahvîhi nemakahu’l-fakīr ileyhi celle şânuhû el-Hâc Mustafa el-Kādî bi-medîneti Galata el-mahrûse -gufira lehû-. Mahmiye-i İstanbul’da Davudpaşa kurbünde Sultan Bayezid-i Cedîd mahallesi ahâlîsinden Mehmed Ağa b. el-Hâc Ahmed nâm kimesne meclis-i şer‘de sarraf tâifesinden karındaşlar olan işbu râfi‘u’l-vesîka Margos ve Anton veledey Toros nâm Ermeniler muvâcehelerinde ikrâr ve takrîr-i kelâm edip akd-i âtî sudûruna değin silk-i mülkümde münselik olup mahrûse-i Galata dâhilinde Sultan Bayezid mahallesinde vâki‘ bir tarafdan Abdi Çelebi veresesi mülkü ve bir tarafdan imâma meşrûta vakıf ahur ve bir tarafdan ba‘zen es-Seyyid Abdurrahman kahvesi ve ba‘zen tarîk-i âm <> ve ba‘zen Belkıs Hânım Vakfı menzili ve taraf-ı râbi‘den tarîk-i âm ile mahdûd ulyâda iki bâb oda ve dehlîz ve kenîf vüstâda iki bâb oda ve bir sofa ve kenîf ve tahtında bir matbah ve bir mağsel ve bi’r-i mâ ve bir mikdâr havluyu müştemil mülk menzil ile yine hudûd-ı merkūm ile mahdûd dört aded mülk horos değirmeni ve iki çarh ve üzerlerinde iki aded bugday destgâhı ve beş aded tahtadan masnû‘ buğday anbarlarımı bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūmân Margos ve Anton’a ale’l-iştirâki’s-seviy dört bin iki yüz guruşa bey‘ u temlîk ve teslîm eylediğimde onlar dahi ber-vech-i iştirâ ve temellük ve tesellüm ve kabûl eylediklerinden sonra semeni olan meblağ-ı mezbûru müşteriyân-ı mezbûrân yedlerinden tamâmen alıp kabz ve istîfâ eyledim fîmâ ba‘d hudûd-ı merkūme ile mahdûd olan mârrü’z-zikr menzil ve değirmen cemî‘ müştemilâtlarıyla merkūmân Margos ve Anton’un iştirâk-i seviyy üzere mülk-i müşterâları olmuşdur keyfemâ yeşâân mutasarrıf olsunlar dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Muharremi’l-harâm sene 1138. Şuhûdü’l-hâl: Halil Efendi b. Hüseyin, Süleyman Efendi b. Osman, Arusi Mustafa Efendi b. Hasan, Molla İbrahim el-mukayyid, İbrahim Çelebi b. Muharrem, Halil Çelebi b. Mustafa, İbrahim b. Mustafa, Mustafa b. Ahmed, Yahya b. Abdullah.