Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 308 Hüküm no: 334 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçer v. Agop’un bağını karısı Anna bt. Asvador’a sattığı Fi’l-asl mahrûse-i Galata muzâfâtından Kapudağı nâhiyesine tâbi‘ Bandırma kasabası sâkinlerinden olup mahrûse-i mezbûrede misâfiren sâkin olan Haçer v. Agop nâm Ermeni meclis-i şer‘de zevcesi işbu hâmiletü’r-rakīm Anna bt. Asvador nâm Ermeniye muvâcehesinde ikrâr ve takrîr-i kelâm edip yedimde mülk ve hakkım olup zikr olunan Bandırma kasabasında vâki‘ bir tarafdan Şamok nâm Ermeni menzili ve bir tarafdan Kenan menzili ve iki tarafdan mekābir-i Müslimîn ve tarîk-i âm ile mahdûd fevkānî beş bâb oda ve iki sofa ve iki tahtapûş ve tahtânî üç bâb mahzen ve iki bâb oda ve kenîfi müştemil mülk menzilim ile kasaba-i mezbûre bağları hilâlinde vâki‘ iki tarafdan el-Hâc Abdi ve Eyüb Beşe bağları ve bir tarafdan Solakoğlu tarlası ve bir tarafdan tarîk-i âm ile mahdûd tahmînen dört buçuk dönüm bağımı târih-i kitâbdan dört sene mukaddem cemî‘ tevâbi‘ ve levâhıkları ve kâffeti’l-menâfi‘ ve’l-merâfıklarıyla bi-safkatin vâhidetin tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem merkūme Anna’ya beş yüz guruşa bey‘ u teslîm edip ol dahi ber-minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûr beş yüz guruşun iki yüz elli guruşunu zevcem müşteriye-i merkūme Anna yedinden seksen Venedik altunu ahz ve bâkī kalan iki yüz elli guruş mukābelesinde dahi zevcem merkūme Anna’nın mâlından olmak üzere iki altın boğmak ve yirmi miskāl bir inci İstefan ve otuz üç miskāl bir çift altın bilezik ve beş ayaklı bir çift inci küpe ve bir sîm kemer kuşak ve bir sîm kadeh ve bir zencirli bir kaftan alıp kabz eyledim binâen aleyh zikirleri sebk eden menzil ve bağ bi-cümletin mâ yeştemilühû ve yahvîhi târih-i mezbûrdan beri zevcem müşteriye-i merkūme Anna’nın mülk-i müşterâsı olup emlâk-ı mezbûrede benim kat‘an alâka ve mehdalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Muharremi’l-harâm sene 1137[1138]. Şuhûdü’l-hâl: Ahmed Efendi b. Süleyman, Süleyman Efendi b. Osman, Mustafa Efendi b. Mehmed, İbrahim b. Muharrem, Halil Çelebi b. Mustafa, İbrahim b. Mustafa.