Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 309 Hüküm no: 335 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Ahmed’in el-Hâc Mustafa b. Mehmed ile alacak davasında sulh oldukları Mahrûse-i Galata hâricinde Bedreddin Bey mahallesinde sâkine iken bundan akdem müteveffiye olan Ümmühâni bt. Hasan b. Abdullah’ın verâseti zevc-i metrûku el-Hâc Mustafa b. Mehmed nâm kimesne ile zî-rahm cihetinden Salih b. Ahmed nâm kimesneye münhasıra olduğu lede’ş-şer‘i’l-enver zâhir ve mukarrer oldukdan sonra mezbûr Salih meclis-i şer‘de tereke-i müteveffâ-yı mezbûreye bi’l-verâse vâzı‘u’l-yed olan işbu râfi‘u’l-kitâb mezbûr el-Hâc Mustafa mahzarında ikrâr ve takrîr-i kelâm edip mûrisimiz müteveffât-ı mezbûrenin terekesinden bana isâbet eden iki sehimde bir sehm hisse-i irsiyyemi mezbûr el-Hâc Mustafa’dan taleb ve da‘vâ sadedinde olmuş idim el-hâletü hâzihî beynimize muslihûn tavassut edip beni da‘vâ-yı mezkûremden mezbûr el-Hâc Mustafa ile sekiz guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr sekiz guruşu mezbûr el-Hâc Mustafa yedinden tamâmen ahz u kabz eylediğimden sonra müteveffât-ı mezbûre Ümmühâni Hâtun’un kalîl ü kesîr ve celîl ü sagīr terekesine müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Zilhicceti’ş-şerîfe sene 1137. Şuhûdü’l-hâl: el-Hâc Mehmed b. Mahmud, Ahmed Çelebi b. Mehmed, el-Hâc İbrahim b. Ahmed Efendi, es-Seyyid Halil Çelebi b. İsmail, Molla Süleyman b. Ali, el-Hâc İbrahim b. Mehmed.