Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 309 Hüküm no: 336 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in Abdullah Efendi Vakfı’ndan bey‘ bi’l-istiğlâl yoluyla ödünç para aldığı Mahrûse-i Galata muzâfâtından kasaba-i Fındıklı’da Yahya Çelebi mahallesinde sâkine zâtı es-Seyyid Ahmed Çelebi b. es-Seyyid Mustafa ve Süleyman Çelebi b. Ali nâm kimesneler ta‘rîfleriyle mu‘arrefe olan Âişe bt. Mehmed nâm hâtun meclis-i şer‘de merhûm Abdullah Efendi nâm sâhibü’l-hayrın kasaba-i mezbûrede vâki‘ câmi‘-i şerîfi evkāfına kāimmakām-ı mütevllî olan işbu râfi‘u’l-kitâb Müezzin Abdullah Çelebi b. Hüseyin nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Kürkcü Ali mülkü ve bir tarafdan Tatar Mehmed Yazıcı ve bir tarafdan Savat Hüseyin mülkü ve bir tarafdan tarîk-i âm ile mahdûd tabaka-i ulyâda bir bâb oda ve sofa ve dehlîz ve tabaka-i vüstâda bir bâb oda ve bir sofa ve dehlîz ve tabaka-i süflâda bir bâb oda ve kenîf ve bir mikdâr bahçeyi müştemil mülk menzilimi bi-tarîki’l-istiğlâl kāimmakām-ı mütevellî-i mezbûr Abdullah Çelebi’ye altmış guruşa bey‘ u teslîm edip ol dahi yedinde olan mâl-ı vakf-ı mezbûr ile ber-vech-i muharrer iştirâ ve tesellüm ve kabûl eyledikden sonra mezbûr Abdullah Çelebi menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzi’l-mer‘î senevî dokuz guruşa olmak üzere târih-i kitâbdan akd-i vâhid ile üç sene tamâmına değin yirmi yedi guruşa yine bana îcâr ve teslîm eyledikde ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fi’l-yevmi’l-âşir min-Muharremi’l-harâm sene 1138. Şuhûdü’l-hâl: es-Seyyid Mukim Çelebi b. Mehmed Emin, es-Seyyid Ahmed Çelebi b. es-Seyyid Mustafa, Süleyman Çelebi b. Ali, Keresteci el-Hâc Abdullah Yazıcı, Ali Beşe b. Yahya.