Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 310 Hüküm no: 337 Orijinal metin no: [48b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Lefter’in Temur v. Karabet’den alacağını tahsil ettiği Sarraf tâifesinden Temur v. Karabet nâm Ermeni meclis-i şer‘-i şerîfde işbu hâmilü’r-rakīm Yanaki v. Lefter nâm zimmî muvâcehesinde ikrâr ve takrîr-i kelâm edip mersûm Yanaki zimmetinde cihet-i karz-ı şer‘îden ber-mûceb-i temessük kırk guruş hakkım olup meblağ-ı merkūmun yirmi bir guruşu mukābelesinde mersûm Temur yedinden her biri beşer guruş birer rub‘ olmak üzere dört cizye kağıdı olup on dokuz guruş hakkım bâkī kalmışdır deyü taleb ve da‘vâ eylediğimde ol dahi meblağ-ı bâkī-i merkūm on dokuz guruşun on beş guruş bir rub‘ mukābelesinde bana bir a‘lâ ve bir evsat cizye kağıdlar verip meblağ-ı mezbûrdan ancak destimde üç guruş üç rub‘ bâkī kaldı deyü ba‘de’d-def‘ ve’l-inkâr mersûm Temur dahi def‘-i mezkûrunu iki nefer şâhid ile muvâcehemde isbât etmeğle ben dahi meblağ-ı bâkī üç guruş üç rub‘u merkūm Temur yedinden tamâmen ahz u kabz edip meblağ-ı merkūm kırk guruşa vesâire müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-Muharremi’l-harâm sene 1138. Şuhûdü’l-hâl: Subaşı Ali Beşe, Ahmed Çelebi b. Abdullah, Ahmed Çelebi b. Mehmed, el-Hâc Ahmed b. Süleyman, Bursalı Mehmed muhzır.