Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 311 Hüküm no: 338 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Yorgi’nin bakkal dükkânındaki eşyalarını Yorgi v. İstavri’ye sattığı Bakkal tâifesinden Dimo v. Yorgi nâm zimmî meclis-i şer‘de yine tâife-i mezbûreden işbu râfi‘u’r-rakīm Yorgi v. İstavri nâm zimmî muvâcehesinde ikrâr ve takrîr-i kelâm edip merkūm Yorgi’ye bundan akdem mahrûse-i Galata hısnı ebvâbından Mumhânekapısı dâhilinde vâki‘ bakkal dükkânı içinde mevcûd mâlım ve mülküm olan emti‘a-i mütenevvi‘a-i ma‘lûmemi on iki bin akçeye <> bâtten bey‘ u teslîm edip ol dahi ber-vech-i muharrer iştirâ ve kabz ve kabûl eyledikden sonra meblağ-ı mezbûr on iki bin akçeye işbu hâzırûn bi’l-meclis Apostol v. Dimo ve Kostantin v. Anaştaş ve Luka v. Tanaş ve Lefteri v. Anaştaş nâm zimmîler kefîl ve dāmin olmuşlar idi el-hâletü hâzihî merkūm Yorgi dükkan-ı mezbûr içinde mevcûd olup on bin beş yüz altmış sekiz akçeye mukavvim olan emti‘a-i mütenevvi‘a-i ma‘lûmeyi alâ tarîki’l-ikāme bi’t-terâzî bana redd ve teslîm etdikde ben dahi rızâm ile mikdâr-ı mezkûr emti‘a ile nükūd bin dört yüz otuz iki akçeyi merkūm Yorgi yedinden tamâmen ahz u kabz ve istîfâ eyledim binâen aleyh merkūm Yorgi zimmetinde bir akçe hakkım kalmayıp ve kefîl olan zimmiyyûn-ı merkūmûn dahi berîü’z-zimmet olmuşlardır dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Muharremi’l-harâm sene 1138. Şuhûdü’l-hâl: Halil Beşe b. Mustafa, İbrahim b. Muharrem, Mehmed b. Ahmed, İbrahim b. Mustafa, Mehmed b. Halil, Mustafa Beşe b. Receb, Molla Mehmed b. Yusuf.