Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 315 Hüküm no: 343 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Hoca b. Yusuf’un küçük oğlu İbrahim’e Ayşe bt. Abdullah’ın vasi tayin edildiği Mahmiye-i İstanbul’da Ayazmakapısı dâhilinde vâki‘ Hoca Hayreddin mahallesinde sâkin iken bundan akdem Galata’da katîlen vefât eden Ömer Hoca b. Yusuf b. Maden nâm kimesnenin sulbî sagīr oğlu İbrahim’in tesviye-i emrini rü’yete kıbel-i şer‘den bir vasî nasbından lâ-büd olup ve sagīr-i mezbûrun anası işbu râfi‘atü’l-vesîka Âişe bt. Abdullah nâm hâtun mu‘temede ve müstakīme ve vasiyet-i mezbûreye her vechile müstehakka olduğu zeyl-i vesîkada muharrerü’l-esâmî Müslimîn haberleriyle zâhir olmağın mezbûre Âişe sagīr-i mezbûrun tesviye-i emrini rü’yete kıbel-i şer‘den vasî nasb ve ta‘yîn olundukda ol dahi ber-vech-i muharrer vesayet-i mezbûreyi kabûl ve hıdemât-ı lâzimesini ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Muharremi’l-harâm sene 1138. Şuhûdü’l-hâl: Mehmed Beşe b. Hüseyin, Süleyman Beşe b. Mehmed, İbrahim Beşe b. Mustafa, Mehmed Beşe b. Hamza, Mustafa Beşe b. Receb, Ahmed b. Mustafa.