Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 315 Hüküm no: 344 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla İbrahim b. Ömer’in annesi Rukiye Hatun bt. Mehmed’e vasi tayin edildiği Mâ fîhi mine’n-nasb ve’t-ta‘yîn vaka‘a bi-ma‘rifeti’l-fakīr ileyhi’l-mu‘în el-Hâc Mustafa el-Kādî bi-medîneti Galata el-mahrûse -gufira lehû-. Mahmiye-i İstanbul’da Davudpaşa mahallesinde sâkine iken bundan akdem müteveffiye olan Fâtıma bt. Mustafa Efendi nâm hâtunun kebîre kızı Rukiye Hâtun bt. Mehmed nâm mecnûnenin umûrunu rü’yete bir vasî nasbından lâ-büd olup ve mecnûne-i mezbûre Rukiye’nin kebîr oğlu olan Molla İbrahim b. Ömer mu‘temed ve müstakīm ve her vechile hizmet-i mezbûre uhdesinden gelmeğe kādir olduğu zeyl-i vesîkada isimleri muharrer olan sikāt-ı muvahhidîn ihbârlarıyla lede’ş-şer‘ zâhir ve mütebeyyin olmağın hâkim-i muvakkı‘-ı a‘le’l-kitâb tûbâ-lehû ve hüsnü-meâb efendi hazretleri dahi işbu râfi‘u’l-kitâb mezbûr Molla İbrahim’i anası mecnûne-i mezbûre Rukiye Hâtun’a vasî nasb ve ta‘yîn eyledikde ol dahi ber-vech-i muharrer vesayet-i mezbûreyi kabûl ve hıdemât-ı lâzimesini mahallinde ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis aşer min-Zilka‘deti’ş-şerîfe li-sene seb‘a ve selâsîn ve mi’e ve elf. Şuhûdü’l-hâl: eş-Şeyh Mehmer Rıza Efendi b. eş-Şeyh İbrahim, Çorbacı el-Hâc Mehmed Ağa b. Musa, Yağlıkcı Ömer Ağa, İmâmzâde Mehmed Ağa b. Mustafa Efendi, Çorbacı Hüseyin Ağa, Sarraczâde Ali Beşe b. el-Hâc Ahmed, Müezzin Hüseyin Çelebi b. el-Hâc Yusuf, Hüseyin Çelebi b. İbrahim, Abdullah Odabaşı b. Hasan C[ema‘at], 29, Ali Bey b. Abdullah, İbrahim Çelebi b. Muharrem, Halil Çelebi b. Mustafa, İbrahim Çelebi b. Mustafa, Mustafa Çelebi b. Ahmed, Mehmed Çelebi b. Ahmed.