Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 316 Hüküm no: 345 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Abdullah’dan oğlu İmamzade Mustafa Efendi’ye intikal eden menzil arsasının Ömer Çelebi b. Bekir’e satıldığı Mâ fîhi mine’l-bey‘ ve’ş-şirâ nemakahu’l-fakīr ileyhi sübhânehû el-Kādî bi-medîneti Galata -gufira lehû-. Mahmiye-i İstanbul’da Davudpaşa mahallesinde vâki‘ zikri câî mülk-i muhterik menzil arsasının üç yük elli sekiz bin beş yüz seksen yedi sehimden on dört bin beş yüz otuz dokuz sehmi Havva bt. Abdullah nâm hâtunun ile’l-vefât irsen mülkü olup ba‘de vefâtihâ mevlâ-yı utâkasının oğlu ve hasren vârisi fahrü’l-müderrisîni’l-kirâm İmâmzâde Mustafa Efendi b. Mehmed’e mevrûs olduğu ve yetmiş beş bin yüz kırk iki sehmi dahi kezâlik Fâtıma bt. Mustafa Efendi nâm hâtunun irsen ile’l-vefât mülkü olup ba‘de vefâtihâ sihâm-ı mezbûresinin nısfı hasren vâriseleri olan kebîre kızı mecnûne Rukiye bt. Mehmed’e ve nısf-ı âharı li-ebeveyn kız karındaşı Havva nâm hâtuna mevrûs olup ba‘dehû mezbûre Havva Hâtun nısf hisse-i şâyi‘a-i mezkûresini Ömer Çelebi b. Bekir nâm kimesneye bâ-hüccet-i şer‘iyye alâ-tarîki’s-sulh bâtten bey‘ u teslîm eylediği ve üç yük altı bin dört yüz yetmiş yedi sehmi dahi tedâvül-i eyâdî ile şirâen mezbûr Ömer Çelebi’nin mülkü olduğu lede’ş-şer‘i’l-enver zâhir ve mütebeyyin oldukdan sonra mezbûr Mustafa Efendi tarafından bey‘-i câi’z-zikri ikrâra vekîli olduğu Kayyum Hasan Efendi b. Osman ve Halil Çelebi b. Yusf nâm kimesneler şehâdetleriyle mahzar-ı hasm-ı münkir-i şer‘îde şer‘an sâbit ve vekâletine hükm-i şer‘î lâhik olan İmâm Ahmed Efendi b. Mehmed nâm kimesne meclis-i şer‘-i hatîr-i lâzimü’t-tevkīrde işbu sâhibü’l-kitâb mezbûr Ömer Çelebi mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin zikr olunan Davudpaşa mahallesinde Çardaklı Hamam hizâsında vâki‘ bir tarafdan ba‘zen es-Seyyid Yahya Efendi ve ba‘zen Arabzâde Ahmed Ağa veresesi mülkleri ve bir tarafdan yine mezbûr Arabzâde Ahmed Ağa veresesi ve ba‘zen Kuyumcu Hasan Çelebi veresesi mülkleri ve bir tarafdan ba‘zen Abidinzâde Hüseyin Ağa mülkü ve ba‘zen Bektaş Ağazâde Murad Ağa odaları ve ba‘zen Âişe Hâtun tasarrufunda olan vakıf arsa ve bir tarafdan tarîk-i âm ile mahdûd fevkānî bir mikdâr enkāzı ve bi’r-i mâ ve eşcâr-ı müsmire ve gayr-i müsmireyi müştemil muhterik mülk menzil arsasının ânifen zikr olunduğu üzere üç yük eli sekiz bin beş yüz seksen yedi sehimden on dört bin beş yüz otuz dokuz sehimi irsen müvekkil-i mezbûr Mustafa Efendi’nin mülkü olmağın müvekkil-i mezbûr Mustafa Efendi dahi arsa-i mahdûde-i mezkûrede olan mikdâr-ı mezkûr hisse-i irsiyyesini cemî‘ tevâbi‘ ve levâhık ve kâffe-i menâfi‘ ve merâfıkıyla tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mezbûr Ömer Çelebi’ye yirmi guruşa bey‘ u temlîk ve teslîm edip ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûru müşterî-i mezbûr Ömer Çelebi yedinden tamâmen ahz u kabz ve istîfâ eyledi fîmâ ba‘d müvekkil-i mezbûr Mustafa Efendi’nin arsa-i mahdûde-i mezbûrede olan mikdâr-ı mezkûr hissesi bi-cümletin mâ yeştemilühâ müşterî-i mezbûr Ömer Çelebi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Zilka‘deti’ş-şerîfe li-sene seb‘a ve selâsîn ve mi’e ve elf. Şuhûdü’l-hâl: es-Sâbikūni’l-evvelûn.