Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 318 Hüküm no: 347 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Ahmed Efendi b. Mehmed’in menzil arsasındaki hissesini Ömer Çelebi b. Bekir’e sattığı El-emru hasbemâ yahvîhi nemakahu’l-fakīr ileyhi azze şânuhû el-Hâc Mustafa el-Kādî bi-medîneti Galata -afâ anhu-. Zikri câî mülk-i muhterik menzil arsasının üç yüz elli sekiz bin beş yüz yetmiş yedi sehimden otuz yedi bin beş yüz yetmiş bir sehimi bâ-hüccet-i şer‘iyye İmâm Ahmed Efendi b. Mehmed’in ve üç yük yirmi bir bin altı sehimi kezâlik bâ-hüccet-i şer‘iyye Ömer Çelebi b. Bekir’in ale’l-iştirâk şirâen mülkleri olduğu lede’ş-şer‘i’l-enver zâhir ve mütebeyyin oldukdan sonra mezbûr İmâm Ahmed Efendi meclis-i şer‘-i hatîr-i lâzimü’t-tevkīrde işbu sâhibü’l-vesîka mezbûr Ömer Çelebi mahzarında ikrâr ve takrîr-i kelâm edip akd-i âtî sudûruna değin mahmiye-i İstanbul’da Davudpaşa mahallesinde Çardaklı Hamam hizâsında vâki‘ bir tarafdan ba‘zen es-Seyyid Yahya Efendi ve ba‘zen Arabzâde Ahmed Ağa veresesi mülkleri ve bir tarafdan yine mezbûr Arabzâde Ahmed Ağa veresesi ve ba‘zen Kuyumcu Hasan Çelebi veresesi mülkleri ve bir tarafdan ba‘zen Abidinzâde Hüseyin Ağa mülkü ve ba‘zen Bektaş Ağazâde Murad Ağa odaları ve ba‘zen Âişe Hâtun tasarrufunda olan vakıf arsa ve bir tarafdan tarîk-i âm ile mahdûd bir mikdâr enkāzı ve bi’r-i mâ ve eşcâr-ı müsmire ve gayr-i müsmireyi müştemil mülk muhterik menzil arsasının ânifen zikr ü beyân olunduğu üzere üç yüz elli sekiz bin beş yüz yedi sehimden otuz yedi bin beş yüz yetmiş bir sehimi benim mâ‘adâsı mezbûr Ömer Çelebi’nin ale’l-iştirâk mülkümüz olmağın hâlâ ben arsa-i mahdûde-i merkūmede olan otuz yedi bin beş yüz yetmiş bir sehm hisse-i şâyi‘amı cemî‘ tevâbi‘ ve levâhıkı ve kâffe-i menâfi‘ ve merâfıkıyla tarafeynden îcâb ve kabûlü hâvî ve şurût-ı müfsideden âri bey‘-i bâtt-ı sahîh-i şer‘î ile mezbûr Ömer Çelebi’ye yüz doksan guruşa bey‘ u temlîk ve teslîm eylediğimde ol dahi ber-vech-i muharrer iştirâve temellük ve tesellüm ve kabûl eyledikden sonra semeni olan meblağ-ı mezbûru müşterî-i mezbûr yedinden tamâmen ahz u kabz ve istîfâ eyledim fîmâ ba‘d arsa-i mahdûde-i merkūmenin mecmû‘u bi-cümletin mâ yeştemiluhâ ve yahvîhâ müşterî-i mezbûr Ömer Çelebi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-gurre-i Zilhicceti’ş-şerîfe li-sene seb‘a ve selâsîn ve mi’e ve elf. Şuhûdü’l-hâl: es-Sâbikūni’l-evvelûn ve’l-âhirûn.