Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 319 Hüküm no: 348 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. Bekir’in menzil arsasını es-Seyyid Yahya Efendi’ye sattığı Mâ fîhi mine’l-bey‘ ve’ş-şirâ nemakahü’l-fakīr ileyhi te‘âlâ el-Hâc Mustafa el-Kādî bi-medîneti Galata -gufira lehû-. Mahmiye-i İstanbul’da Davudpaşa kurbünde vâki‘ Sultan Bayezid-i Cedîd mahallesi ahâlîsinden Ömer Çelebi b. Bekir nâm kimesne meclis-i şer‘-i hatîr-i lâzimü’t-tevkīrde umdetü’l-kuzāti’l-müteşerri‘în işbu kitâb-ı sıhhat-nisâbın hâfızı es-Seyyid Yahya Efendi necli’l-merhûm es-Seyyid Mehmed Efendi mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup sâbıku’z-zikr Davudpaşa mahallesinde Çardaklı Haman hizâsında vâki‘ bir tarafdan ba‘zen mûmâ-ileyh es-Seyyid Yahya Efendi ve ba‘zen Arabzâde Ahmed Ağa veresesi mülkleri ve bir tarafdan ba‘zen yine mezbûr Arabzâde Ahmed Ağa veresesi ve ba‘zen Kuyumcu Hasan Çelebi veresesi mülkleri ve bir tarafdan ba‘zen Bektaş Ağazâde Murad Ağa odaları ve ba‘zen Âişe Hâtun tasarrufunda olan vakıf arsa ve bir tarafdan tarîk-i âm ile mahdûd ve mümtâz bir mikdâr enkāzı ve bi’r-i mâ ve eşcâr-ı müsmire ve gayr-i müsmireyi müştemil mülk muhterik menzil arsamı bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî <> ve şurût-ı müfsideden ârî bey‘-i bâtt-ı sahîh-i şer‘î ile mûmâ-ileyh es-Seyyid Yahya Efendi’ye üç yüz guruşa bey‘ u temlîk ve teslîm edip ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûrü’n-na‘at üç yüz guruşu mûmâ-ileyh es-Seyyid Yahya Efendi yedinden tamâmen alıp kabz eyledim ba‘de’l-yevm arsa-i mahdûde-i mezbûre bi-cümletin mâ yeştemiluhâ ve yahvîhâ müşterî-i mûmâ-ileyhin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mezbûr Ömer Çelebi’nin kebîr oğlu Molla İbrahim meclis-i mezbûrda ikrâr ve takrîr-i kelâm edip eğer ba‘de zamânin arsa-i mahdûde-i mezkûreye müstehak çıkıp müşterî-i mûmâ-ileyh es-Seyyid Yahya Efendi yedinden şer‘an ahz olunursa ben semen-i mezbûr üç yüz guruşa kefâlet-i sahîha-i şer‘iyye ile kefîl ve dāmin oldum dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Zilhicceti’ş-şerîfe sene seb‘a ve selâsîn ve mi’e ve elf. Şuhûdü’l-hâl: eş-Şeyh Mehmed Rıza Efendi b. eş-Şeyh İbrahim, el-Hâc Mehmed Ağa b. Musa çorbacı-i cebeci, Yağlıkcı Ömer Ağa, Mehmed Efendi b. Ahmed el-imâm, Hasan Çelebi b. el-Hâc Yusuf el-müezzin, İbrahim Çelebi b. Muharrem, Hüseyin Çelebi b. İbrahim, Abdullah Odabaşı b. Hasan C. 29, Şa‘banzâde İsmail Çavuş, Sarraczâde Ali Beşe b. el-Hâc Ahmed, Ali Bey b. Abdullah, İmâmzâde Mehmed Ağa b. Mustafa Efendi, Halil Efendi b. Hüseyin, Mustafa Efendi b. Hasan, Ahmed Efendi b. Süleylman, Halil Çelebi b. Mustafa, İbrahim b. Mustafa, Mustafa Çelebi b. Ahmed, Mustafa Beşe b. Receb, Yusuf Beşe b. Abdullah.