Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 320 Hüküm no: 349 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in menzilinin Rahime bt. Mehmed’e satıldığı << Mâ fîhi mine’l-bey‘ ve’ş-şirâ nemakahü’l-fakīr ileyhi te‘âlâ el-Hâc Mustafa el-Kādî >> Mahrûse-i Galata’da el-Hâc A‘mâ mahallesinde sâkine Rukiye bt. Mehmed b. Abdullah nâm hâtunun zevci ve tarafından bey‘-i âti’z-zikri ikrâra vekîl olduğu mezbûrenin zâtını ma‘rifet-i şer‘iyye ile ârifân Ahmed Kapudan b. Mustafa ve el-Hâc Mehmed b. el-Hâc Osman nâm kimesneler şehâdetleriyle [vekâleti] sâbit olan Mehmed b. Mustafa nâm kimesne meclis-i şer‘de işbu sâhibetü’l-kitâb Rahime bt. Mehmed nâm hâtun mahzarında ikrâr ve takrîr-i kelâm edip akd-i âtî sudûruna değin zevcem müvekkile-i mezbûrenin silk-i mülkümde münselik olup mahrûse-i mezbûre muzâfâtından kasaba-i Kasımpaşa’da el-Hâc Hüsrev mahallesinde vâki‘ bir tarafdan Tacir İbrahim Çelebi menzili ve bir tarafdan Molla Ahmed nâm kimesne menzili ve bir tarafdan Bakkal Mehmed nâm kimesne menzili ve bir tarafdan tarîk-i hâs ile mahdûd fevkānî bir bâb oda ve bir sagīr sofa ve abdesthâne ve tahtânî üç bâb oda ve bir sofa ve kenîf ve bi’r-i mâ ve bahçeyi müştemil mülk menzilini mezbûre Rahime Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz altmış guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz altmış guruşu müşteriye-i mezbûre Rahime Hâtun yedinden tamâmen alıp kabz eyledi ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi mezbûre Rahime Hâtun’un mülk-i müşterâsı olup zevcem müvekkile-i mezbûre Rukiye Hâtun’un kat‘an alâka ve medhali kalmamışdır keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Muharremi’l-harâm sene 1137[1138]. Şuhûdü’l-hâl: el-Hâc Mehmed b. el-Hâc Osman, Molla Mehmed b. Hasan, Ahmed Çelebi b. Abdullah, İmâm es-Seyyid Yahya Efendi, Müezzin el-Hâc Mehmed, İpci Hasan Çelebi, Tacir İbrahim Çelebi, Bakkal Mehmed Çelebi, Halil Çelebi b. Mustafa, İbrahim b. Mustafa, Mustafa b. Ahmed, Mehmed b. Ahmed.