Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 321 Hüküm no: 350 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in menzilinin yarı hissesini sattığı, diğer yarısının Ümmügülsüm adına kocası Mehmed b. Süleyman’a teslim edildiği Mahrûse-i Galata muzâfâtından kasaba-i Kasımpaşa’da Sahaf Muslihiddin mahallesinde sâkine Ümmügülsüm bt. İbrahim nâm hâtunun zevci ve tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Süleyman Efendi b. Mustafa ve Mehmed b. Ali nâm kimesneler şehâdetleriyle sâbit olan Mehmed b. Süleyman nâm kimesne meclis-i şer‘de işbu râfi‘u’l-kitâb diğer Mehmed Çelebi b. Veli nâm kimesne mahzarında mahalle-i mezbûre imâmı ve zikri âtî vakıf menzilin mütevellîsi İmâm Abdurrahman Efendi b. Mustafa hâzır olduğu hâlde bi’l-vekâle ikrâr ve takrîr-i kelâm edip galle ve tevliyeti mahalle-i mezbûre mescid-i şerîfinde imâm olanlara meşrûta vakıf olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd vakıf menzil icâreteyn-i ma‘lûmeteyn ile zevcen müvekkile-i mezbûre Ümmügülsüm’ün babası müteveffâ İbrahim’in taht-ı tasarrufunda iken mezbûr İbrahim hayâtında menzil-i mevkūf-ı mezbûru zevcesi Hadice bt. Mehmed nâm hâtuna ma‘rifet-i mütevellî ile ferâğ ve tefvîz edip ba‘dehû mezbûre Hadice Hâtun dahi menzil-i mezbûrun nısf-ı şâyi‘ini mezbûr diğer Mehmed ile zevcesi Âişe bt. İbrahim nâm hâtuna ma‘rifet-i mütevellî ile ferâğ ve tefvîz etmeğin hâlâ mezbûr diğer Mehmed’den suâl olunup tasarrufunda olan menzil-i mevkūf-ı mezbûrun nısf-ı şâyi‘i zevcem müvekkile-i mezbûre Ümmügülsüm için bana teslîme tenbîh olunmak matlûbumdur dedikde vekîl-i mezbûrun takrîr-i meşrûhu üzere da‘vâsı meşrû‘ olmayıp ve mezbûr diğer Mehmed’e suâl dahi teveccüh etmeğin mûcebiyle vekîl-i mezbûr bilâ vech-i şer‘î mezbûr diğer Mehmed’e mu‘ârazadan men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Muharremi’l-harâm sene 1138. Şuhûdü’l-hâl: Süleyman Efendi b. Mustafa, Mehmed Çelebi b. Ali, Halil Çelebi b. Mustafa, Mustafa Beşe b. Ahmed, Mehmed b. Ahmed, İbrahim b. Mustafa, Mehmed b. Ahmed, Baba Yusuf b. Abbullah.