Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 322 Hüküm no: 351 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’daki kunduracı tâifesiyle kara pabuccu tâifesinin imdâdiye ücretinde anlaştıkları Mahrûse-i Galata’da vâki‘ kunduracı tâifesinin kethudâları Loyzo v. Hristodori ve Praşkova v. Sotri ve Duka v. Yenaki ve Zafiri v. Panayot nâm zimmîler vesâirleri mahfil-i şer‘de yamakları olan kara papuccu tâifesinden işbu hâmilü’r-rakīm Yorgi v. Panoli ve Praşkova ve Aleksan ve Dimitri v. Yorgi nâm zimmîler vesâirleri muvâcehelerinde her biri takrîr-i kelâm edip biz kadîmden beri Tersane-i âmire tarafına beher sene bin yedi yüz akçe bedel-i lağım kazma kürek verip ve zikr olunan kara papuccu tâifesi bize yamak olmalarıyla teklîf-i merkūm için senede bize imdâdiye nâmıyla dörder yüz akçe veregelmişler idi lâkin tâife-i merkūme evvelkinden ziyâde olmağla biz dahi tâife-i merkūmeden senevî veregeldikleri dörder yüz akçeden ziyâde taleb eylediğimiz ecilden beynimizde nizâ‘ ve cidâl vâki‘ olmuş idi el-hâletü hâzihî tâife-i merkūme veregeldikleri dörder yüz akçe imdâdiyelerine rızâlarıyla senede üç yüz yirmişer akçe dahi zamm ve beher sene teklîf-i merkūm için bize yedişer yüz yirmişer akçe verip biz dahi meblağ-ı merkūmu ahz ve ziyâde taleb eylememek üzere zikr olunan kara papuccu tâifesiyle beynimizde kavl ü ittifâk ve ahd ü mîsâk eyledik dediklerinde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis min-Muharremi’l-harâm sene 1138. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Yusuf Beşe b. Abdullah, İbrahim Çelebi b. Mustafa, Mustafa Çelebi b. Ahmed, Süleyman Çelebi b. Ahmed.